Բեռլինում կայացել է Ուկրաինայի վարչապետ Արսենի Յացենյուկի հանդիպումը Գերմանիայի կանցլեր Անգելա Մերկելի հետ: Այս մասին հայտնել է korrespondent.net-ը:
Քաղաքական գործիչներն առանցքային ուշադրություն են հատկացրել Ուկրաինայում բարեփոխումների իրականացմանը, վերջինիս ֆինանսական և տնտեսական իրավիճակին, միջազգային, տնտեսական, ներդրումային և էներգետիկայի ոլորտներում համագործակցությանը և Դոնբասի զարգացումներին:
Յացենյուկը հայտարարել է, որ Ուկրաինան չի ստանում ֆինանսական աջակցություն անվերադարձ պայմանով: Նա ընդգծել է, որ Ուկրաինայի կառավարությունը դավանում է թափանցիկության սկզբունքը և պատրաստ է տրամադրել ամբողջական տեղեկատվություն այն մասին, թե որտեղ են կիրառվում միջոցները:
Յացենյուկը հայտարարել է, որ Ռուսաստանը «որոշել է գրավել ու ապօրինաբար զավթել Ղրիմը և Ուկրաինայի արևելյան շրջանները»:
Նա նշել է, որ Ուկրաինայում շարունակվող հակամարտությունը միայն Ուկրաինայի ու Ռուսաստանի միջև չէ. «Դա գլոբալ խնդիր է: Մենք պայքարում ենք սեփական անկախության, ազատության, մեր երկրի և հողի համար»:
«Մենք պետք է միասնաբար պայքարենք ահաբեկչության դեմ»,- ասել է Յացենյուկը:
Գերմանիայի կանցլեր Անգելա Մերկելը հայտարարել է, որ հակառուսական պատժամիջոցների փուլային վերացումն անհնար է:
