Եվրոպայի խորհրդի գլխավոր քարտուղար Թյորբյորն Յագլանդը ԵԽԽՎ-ում անդրադարձել է Լեռնային Ղարաբաղի վերաբերյալ ադրբեջանական պատվիրակության ներկայացուցչի հարցին: Ինչպես հաղորդում է «Արմենպրես»-ը, այս մասին տեղեկացնում է ադրբեջանական ԱՊԱ գործակալությունը:
«Եվրոպայի խորհուրդը մինչև հիմա որևէ դեր չի խաղացել այդ հիմնախնդրի կարգավորման գործում: Այդ հարցով զբաղվում է ԵԱՀԿ Մինսկի խումբը: Եվրոպայում մարդու իրավունքների վիճակի մասին ԵԽԽՎ ընդունած վերջին զեկույցում ասվում է, որ «մենք չենք կարող մեր գործիքները կիրառել «սառեցված» հակամարտությունների գոտիներում»,- ասել է Յագլանդը' նշելով, որ ԵԽ-ն չի կարող որևէ ներդրում ունենալ խնդրի կարգավորման հարցում: Նա կոնֆլիկտային տարածաշրջանները մարդու իրավունքների տեսանկյունից անվանել է «սև անցքեր»:
ԵԽ գլխավոր քարտուղարը ցանկություն է հայտնել, որ ԵԽԽՎ կոնվենցիան կիրառվի նաև «սառեցված» հակամարտությունների գոտիներում: «Ցանկացած մարդ Եվրոպայում, այդ թվում և Մերձդնեստրյան շրջանում ու Լեռնային Ղարաբաղում, պետք է լինի Մարդու իրավունքների եվրոպական կոնվենցիայի և այլ համապատասխան միջազգային փաստաթղթերի պաշտպանության տակ»,- ասել է Յագլանդը:
