ԻՊ-ն Մոսուլում մի քանի կարևոր կամուրջներ է ականապատել՝ մտադրություն ունենալով դրանք պայթեցնել քաղաքի վրա իրաքյան ուժերի հարձակում սկսելու ժամանակ:

 

Ինչպես հաղորդում է «Արմենպրես»-ը՝ վկայակոչելով լիբանանյան «Ալ Մայադին» գործակալությունը, Մոսուլի հարավում ահաբեկիչները Ջուբուր ցեղախմբի 12 երիտասարդի են սպանել:

 

Աղբյուրի տեղեկացմամբ, ալ Բաղդադի քաղաքում անվտանգության ուժերի ռմբակոծության հետևանքով 4 մահապարտ-ահաբեկիչ են սպանվել: Մայրաքաղաք Բաղդադի հարավում՝ Սայիդիա շրջանում, պայթյունի հետևանքով մեկ զոհ և 8 վիրավոր են գրանցվել: Միևնույն ժամանակ, Բաղդադի Դաուրա շրջանում հրթիռներ ընկնելու հետևանքով 3 զոհ և 7 վիրավոր են գրանցվել:

 

Իրաքյան բժշկական աղբյուրների տեղեկացմամբ, ԻՊ-ի 17 ահաբեկիչ են սպանվել միջազգային դաշինքի ռմբակոծության արդյունքում Սիրիայի սահմանակից Կաիմ քաղաքի մերձակայքում: Վիրավորվել են շուրջ 30 ահաբեկիչ: Սամրա քաղաքի հյուսիսում բախումների հետևանքով ԻՊ-ի տասնյակ ահաբեկիչներ են սպանվել:

 

Ավելի վաղ «Իսլամական պետության» ահաբեկիչները պայթեցրել էին իրաքյան Մոսուլում գտնվող Ալ Խադար հնագույն մզկիթը: ԻՊ-ն համացանցում տարածել էր տեսանյութ, որտեղ ցուցադրվող կադրերում երևում են, թե ինչպիսի ավերածությունների է ենթարկվել Մոսուլի պատմական թանգարանը:

 

«Իսլամական պետություն» ծայրահեղական կազմակերպությունը համարվում է աշխարհի ամենավտանգավոր, ամենախոշոր և ամենահարուստ ահաբեկչական կազմակերպությունը, որը կարճ ժամանակում հսկայական տարածքներ է գրավել Սիրիայում և Իրաքում: ԻՊ կազմակերպությունում ընդգրկվել են 80 երկրի մոջահեդներ: