Խորհրդարանը քվեարկությամբ մերժեց «Գազամատակարարման բնագավառում հայտնաբերված չարաշահումների և Հայաստանի Հանրապետությունում ««ՀայՌուսգազարդ» ՓԲԸ-ի կողմից սպառողներին վաճառվող բնական գազի սակագնի իջեցմանն ուղղված միջոցառումների մասին» որոշման նախագիծը նիստերի օրակարգ մտցնելու հարցը: Այն նիստերի օրակարգ ընդգրկելուն կողմ քվեարկեց 43, դեմ՝ 62, ձեռնպահ 1 պատգամավոր:

 

Որոշման նախագիծը ներկայացրել է Ազգային ժողովի ՀԱԿ խմբակցությունը: Նախագծով առաջարկվում է Ազգային ժողովի գազի հանձնաժողովի աշխատանքի արդյունքում գազամատակարարման ոլորտում հայտնաբերված չարաշահումների մասին հաղորդում ուղարկել ՀՀ գլխավոր դատախազություն:

 

Մինչ այդ, ԱԺ տնտեսական հարցերի մշտական հանձնաժողովը բացասական եզրակացություն էր ներկայացրել որոշման նախագծի վերաբերյալ, ուստի այն ԱԺ լիագումար նիստերի օրակարգում ընդգրկելու հարցն առանձին քվեարկության դրվեց: