ՀՀ առողջապահության նախարար Արմեն Մուրադյանն ընդունեց Ֆրանսիահայ բժիշկների միության նախագահ (Armenian Medical Union of France) Միշել Շահինյանին:

 

Հյուրը նշեց, որ միության անդամներն ամեն տարի այցելություններ են կատարում Հայաստանի մարզեր: Նրա խոսքով' եթե նախկինում աշխատանքը կենտրոնացած էր գլխավորապես մայրաքաղաքում, ապա այժմ իրենք ընդլայնել են գործունեության շրջանակը' ընդգրկելով նաև Հայաստանի մարզերը:

 

Կողմերն անդրադարձան Հայաստանի և Ֆրանսիայի մասնագետների միջև ակտիվ համագործակցության անհրաժեշտությանը:

 

Արմեն Մուրադյանը կարևորեց մարզերային բժիշկների Ֆրանսիայում վերապատրաստվելու և հետագայում մասնագիտական գործունեությունը հայրենիքում շարունակելու հարցը:

 

Հանդիպման ընթացքում քննարկվեցին նաև համագործակցության սերտացման, համատեղ ծրագրերի իրականացմանը վերաբերող բազմաթիվ հարցեր:

 

Նշենք, որ Հայաստանի մարզերի բնակչության առողջական խնդիրների լուծման նպատակով Ֆրանսիայում գործող այս բարեգործական կառույցի կողմից տարբեր տարիների կտրվածքով աշխատանքներ են իրականացվել առողջապահական մի շարք ուղղություններով:

 

Շուրջ 200 մասնագետ անդամակցում է 1975 թվականին Փարիզում ստեղծված Ֆրանսիահայ բժիշկների միությանը: