Հայաստանի Հանրապետական կուսակցության գործադիր մարմնի նիստում քննարկվել է Արփինե Հովհաննիսյանին արդարադատության նախարար նշանակելու հարցը: Այս մասին նիստի ավարտից հետո լրագրողների հետ զրույցում հայտնեց ՀՀԿ խոսնակ, ՀՀ ԱԺ փոխնախագահ Էդուարդ Շարմազանովը: «Նիստի ընթացքում մենք քննարկել ենք արդարադատության նախարարի հարցը: Հանրապետության Նախագահը Արփինե Հովհաննիսյանին այդ պաշտոնում նշանակելու հարցով խորհրդակցել է գործադիր մարմնի անդամների հետ և իր որոշումը կկայացնի»,- նշեց Շարմազանովը:

 

Նա նաև շեշտեց, որ կուսակցության գործադիր մարմնի անդամները դրական են տրամադրված Արփինե Հովհաննիսյանին արդարադատության նախարարի պաշտոնում տեսնելու հարցում: «Մենք այն կարծիքին ենք, որ նա փորձառու և պրոֆեսիոնալ անձնավորություն է, և կարող է բարձր մակարդակով կատարել պարտականություններն իր պաշտոնում»,- նշեց նա՝ ևս մեկ անգամ շեշտելով, որ Նախագահը իր որոշումը կկայացնի:

 

Շարմազանովը նաև ընդգծեց, որ սեպտեմբերի 3-ի նիստում, բացի Արփինե Հովհաննիսյանից, արդարադատության նախարարի պաշտոնում այլ թեկնածուների հարց չի քննարկվել: ԳՄ նիստին մասնակցել է նաև Արփինե Հովհաննիսյանը, ով ԳՄ անդամ չէ: