Ինչպես և մյուս բոլոր կուսակցությունները, ՀՀԿ-ն նույնպես այս օրերին զբաղված է իր նախընտրական ցուցակը կազմելով: Սակայն, կարծես թե այդ գործընթացը իշխող կուսակցության մոտ սպասվածի պես հարթ չի ընթանում: Կուսակցության վերնախավում մինչ օրս քննարկվում է այն հավանական թեկնածուների հարցը, ովքեր կարող են շատ ձայներ ապահովել. ենթադրվում է, որ յուրաքանչյուր ընտրատարածքից պետք է լինի այնպիսի թեկնածու, ում բարձր ինտելեկտն ու բարի համբավը պարտադիր պայման չեն, պարտադիրը «ձայներ բերելու» կարողությունն է։ Այս տրամաբանությունը հաշվի առնելով, կարելի է ենթադրել, որ իշխող մեծամասնության խորհրդարանական «խճանկարն» էական փոփոխություններ չի կրի: Միևնույն ժամանակ` ակնհայտ է, որ ՀՀԿ-ն ձգտելու է հնարավորինս թարմացնել իր ցուցակները, ջանալով ազատվել հասարակության կողմից, մեղմ ասած, չընկալվող և նույն ՀՀԿ–ի համար արջի ծառայություններ մատուցող թեկնածուներից:

Մինչ ՀՀԿ-ի «հասարակ մահկանացուներն» անհամբեր սպասում են կուսակցության նախընտրական ցուցակի հստակեցմանը՝ ակնկալելով սեփական ճակատագրի հարցում որոշակիություն, առանձին-առանձին Բաղրամյան 26 են կանչվում «ընտրյալները»։ Առաջին այցելուները գործարարներն են: Նրանցից հետաքրքրվում են՝ ինչ ցանկություն եւ հնարավորություններ ունեն, ու ըստ այդմ էլ՝ համապատասխան ցուցումներ տալիս: Դեռևս հասկանալի չէ՝ ՀՀԿ-ն շնորհակալ կլինի՞ այն փոքր ուժերին, որոնք ժամանակին սեփական հեղինակությունը կորցնելու գնով սատարեցին կառավարող կուսակցությանը և որպես բարոյական վնասի փոխհատուցում՝ ստացան խորհրդարանական մանդատներ: Արդյո՞ք ՀՀԿ-ն նոր գումարման ազգային ժողով կգնա հին «բեռը» ուսերին: Վերջին անգամ այդ ուժերը ՀՀԿ-ին լուրջ աջակցություն ցուցաբերեցին աշնանը կայացած ՏԻՄ ընտրությունների ժամանակ՝ հատկապես՝ Գյումրիում, Բալասանյանի դաշինքին սատարելով: Ցուցակների ճշգրտումից հետո պարզ կլինի նաև ՀՀԿ երախտապարտության կամ երախտամոռության աստիճանը...

Քաղաքական դաշտում շրջանառվող վարկածների թվին է դասվում նաև այն լուրը, որ նախկին վարչապետ Հովիկ Աբրահամյանը այդպես էլ չի գտնի իր տեղը՝ «լավագույն եռյակում»: 1999 թվականից իշխանական ուժի գրեթե բոլոր ընտրությունների շտաբի պետը եղել է Հովիկ Աբրահամյանը։ Սակայն այս ընտրություններին ընդառաջ՝ Հովիկ Աբրահամյանի դերի էական նվազում է նկատվում, ինչը բնավ անսպասելի անակնկալների շարքից չէ: Հակառակ դեպքում, դա որևէ կերպ չէր տեղավորվի ՀՀԿ-ի ստանձնած «փոփոխությունների դրոշակակրի» նոր ամպուլայի մեջ:

Գլխավոր հարցի պատասխանը նույնպես մշուշոտ է: Կգլխավորի՞ արդյոք Սերժ Սարգսյանը ՀՀԿ ցուցակը, թե՞ իրականություն կդառնա այն, ինչ կանխատեսում էին փորձագետները, այն է՝ նախագահը կտա իշխանության սահուն փոխանցման գործընթացի սկիզբը ոչ միայն երկրում, այլ նաև ՀՀԿ ներսում: Ցուցակում չընդգրկվելու մասին որոշում կայացնելու պարագայում, առավել հավանական է, որ Սերժ Սարգսյանը կստանձնի ՀՀԿ նախընտրական շտաբի պետի պաշտոնը: ՀՀԿ նախընտրական քարոզչության հիմնական պատասխանատուն, ամենայն հավանականությամբ, կլինի Արմեն Աշոտյանը, շտաբում կլինի նաև նախագահի նախկին օգնական Սևակ Լալայանը:

ՀՀԿ ռեյտինգային ցուցակի ոդիսականն այսքանով չի ավարտվում: Դեռևս բաց է նաև ցուցակում այն գործչի ներգրավման հարցը, ում և ենթադրվում է փոխանցել իշխանությունը: ՀՀԿ համագումարում Սերժ Սարգսյանը նշել էր, որ հենց Կարեն Կարապետյանի օգնությամբ է ջանալու փոփոխություններ մտցնել ՀՀԿ զարգացման վեկտորի մեջ: Սակայն կուսակցությունը դեռևս չի հաջողացնում գտնել Կարապետյանի՝ երկրում 5 տարի մշտական բնակության տեղեկանքի հետ կապված հարցի լուծումը: Այս պարագայում ՀՀԿ ցուցակը կարող է զրկվել նաև այդքան գովաբանված դրայվից: Քանի որ իրավական հիմքերը հեղհեղուկ են, իսկ Կարապետյանը, լինելով ՀՀԿ քիչ թե շատ ընկալվող գործիչներից մեկը, դժվար թե դիմի կեղծ տեղեկանքների ավանտյուրայի, ապա հարց է առաջանում՝ ովքե՞ր են ՀՀԿ նախընտրական ցուցակի առավել հավանական «ռեզերվիստները»:

Թերևս, անգամ ամենալավատեսները չեն կարող ակնկալել նոր անունների հայտնվելը թոփ-հնգյակում: Առավել հավանական փոխարինողներն են Տարոն Մարգարյանը, Վիգեն Սարգսյանը և Արփինե Հովհաննիսյանը: Այս եռյակը տվյալ պահին ՀՀԿ լավագույն այլընտրանքն է, որը բաղկացած է հնարավորինս քիչ ինտրիգների և կուլիսային խաղերի մեջ ներգրավված անձանցից:

Միաժամանակ, ՀՀԿ-ական կանանց տունն էլ կռիվ է ընկել…կին պատգամավորներն ու նախարարները ՀՀԿ նախընտրական ցուցակում առաջին կին թեկնածուի տեղի համար թեժ պայքար են սկսել: Ամիսներ առաջ Կարեն Կարապետյանն առաջարկել էր, որ ճիշտ կլինի նախընտրական ցուցակի առաջին կին թեկնածուն լինի Արդարադատության նախարար Արփինե Հովհաննիսյանը՝ որպես երիտասարդ, գրագետ թեկնածու։ Այս առաջարկն այնքան էլ դուր չէր եկել մշտապես ցուցակի առաջին հորիզոնականները զբաղեցրած ՀՀԿ-ական կանանց՝ մասնավորապես՝ ԱԺ փոխխոսնակ Հերմինե Նաղդալյանին։ Ինչպես տեսնում ենք, ամեն ինչ չէ, որ խաղաղ է «հանրապետական թագավորությունում», հետևաբար, յուրաքանչյուր պահի կարող ենք սպասել նորանոր վերադասավորումների և էլ ավելի հետաքրքրական զարգացումների..

Ստելլա Խաչատրյան