Հայաստանի ձմեռային կենտրոններից մեկում' Ծաղկաձորում, ավարտին է մոտենում դահուկավազքի Հայաստանի մեծահասակների առաջնությունը: Հայաստանի առաջնության «Ազատ ոճ 10 կմ» տղամարդկանց պայքարում լավագույններն էին Սերգեյ Միքայելյանը, Միքայել Միքայելյանը և Թադևոս Պողոսյանը: Կանանց «5 կմ ազատ ոճ»-ում եռյակը կազմեցին Կատյա Գալստյանը, Աննա Ռաշոյանը և Աննա Մխիթարյանը:

Մրցումային երկրորդ օրը դահուկորդներն ուժերը չափեցին «Դասական ոճ 10 կմ» մրցաձևում: Տղամարդկանց պայքարում կրկին առաջին տեղում Սերգեյ Միքայելյանն էր, նրան հաջորդում էին Միքայել Միքայելյանը և Թադևոս Պողոսյանը: Աղջիկների պայքարում մրցանակակիրներ դարձան Կատյա Գալստյանը, Աննա Մխիթարյանը և Մարիամ Միքայելյանը:

1100 մետր արագավազքի աղջիկների պայքարում Հայաստանի չեմպիոն դարձավ Աննա Մխիթարյանը, իսկ արծաթե և բրոնզե մեդալները նվաճեցին՝ հաջորդաբար՝ Կատյա Գալստյանը և Մարիամ Մխիթարյանը: Տղաների պայքարում նորից ոսկե մեդալ նվաճեց Սերգեյ Միքայելյանը, նրան հաջորդեց կրտսեր եղբայրը' Միքայել Միքայելյանը, ապա՝ Թադևոս Պողոսյանը:

Մրցումային 4-րդ օրը դահուկորդները կմրցեն արդեն արագավազքի դասական ձևում: