Սանկտ Պետերբուրգի մետրոյում կատարված ահաբեկչական գործողության զոհերի ընդհանուր թիվը հասել է 14-ի: Այդ մասին հայտնել է ՌԴ առողջապահության նախարար Վերոնիկա Սկվորցովան:

«Այսօր կարելի է արձանագրել 14 մարդկանց մահը»,- ասել է նա լրագրողներին, հավելելով, որ նրանցից 11-ը մահացել են պատահարի վայրում, մեկը՝ հիվանդանոց տեղափոխելու ճանապարհին, եւս երկուսը՝ հիվանդանոցի ընդունարանում:

Նախարարի խոսքով՝ ներկայում 49 մարդ գտնվում է ստացիոնարում: «13-ին բաց են թողել: Բոլոր հիվանդներին ամեն օր զննում են լավագույն մասնագետները, բոլորն ապահովված են դեղորայքով եւ արյամբ»,-հայտնել է Սկվորցովան:

Ապրիլի 3-ին վագոնում պայթյուն է տեղի ունեցել Պետերբուրգի մետրոպոլիտենի «Սեննայա պլոշչադ» եւ «Տեխնոլոգիչեսկի ինստիտուտ» կայարանների միջեւ ընկած ուղեմասում: Ավելի ուշ «Պլոշչադ վոստանիա» կայարանում հայտնաբերվել եւ վնասազերծվել է ինքնաշեն պայթուցիկ սարք:

Զանգվածային լրատվամիջոցների տվյալներով՝ պայթուցիկ սարքը կարող էր գործողության մեջ դնել 23-ամյա մի միջինասիացի, որը կապված է Ռուսաստանում արգելված արմատական իսլամիստական խմբավորումների հետ:

Հարուցվել է քրեական գործ «Ահաբեկչական գործողություն» հոդվածով, հետաքննությունը դիտարկում է պատահարի նաեւ այլ վարկածներ, հաղորդել է ՏԱՍՍ-ը:

Լուսանկարը' ТАСС