Բասկետբոլի Մ 16 տարեկան աղջիկների Հայաստանի հավաքականը նախորդ շաբաթ Եվրոպայի C դիվիզիոնի առաջնությունում նվաճեց չեմպիոնի կոչումը: Թիմի ավագ մարզիչ Վահագն Հարությունյանը լրագրողների հետ զրույցում ամփոփեց առաջնության արդյունքները.
«Բավական լավ թիմ ունենք, չնայած միշտ ավելին եմ պահանջում աղջիկներից: Մեկ ամիս ուսումնամարզական հավաք էինք անցկացրել, որն իր արդյունքը տվեց: Թույլ մրցակիցներ չկային, բացի Ջիբրալթարից: Բայց, սպորտային բախտն այս անգամ մեր կողմն էր:
C դիվիզիոնում լավագունը ճանաչված Աննա Ասլանյանի մասին կարելի է երկար խոսել: Նա իր տեխնիկական որակներով շատ է տարբերվում մնացած խաղացողնեից: Նա կարող է հաջողությամբ հանդես գալ նաեւ B դիվիզիոնում: Խաղացողն առաջինը պետք է կարեւորի թիմը, հետո անձնական հաջողությունը: Աննան հենց այդպիսին է:
Շատ դեպքերում կարճ ուսումնամարզական հավաքաների ընթացքում դժվար է բացատրել թիմային գաղափարը»,- Վահագն Հարությունյանի խոսքը մեջբերում է ՀԱՕԿ-ի կայքը:
Մարզիչը նշեց, որ հանդիպել է ֆեդերացիայի նախագահ Հրաչյա Ռոստոմյանի հետ եւ նախնական համաձայնության են եկել, որ աղջիկների Մ 20 տարեկանների հավաքականը հաջորդ տարի հանդես կգա Եվրոպայի B դիվիզիոնի առաջնությում: Հարությունյանը հայտնեց, որ Մ 18 տարեկանների վերաբերյալ առայժմ չեն կողմնորոշվում, իսկ Մ 16 տարեկանների մայրցամաքի առաջնությանը դեռեւս չեն մասնակցի: Որոշումները կհստակեցվեն սեպտեմբերին:
