Հայաստանի արտգործնախարար Էդվարդ Նալբանդյանը առաջնահերթ է համարում Արցախի կարգավիճակի ու անվտանգության ապահովման հարցը: Այս մասին նա ասաց Միացյալ Թագավորության Եվրոպայի և Ամերիկաների հարցերով պետնախարար Ալեն Դանքնի հետ համատեղ ասուլիսի ընթացքում՝ պատասխանելով լրագրողների հարցին՝ կապված Հայաստան-Սփյուռք համաժողովի շրջանակում տարածքների վերաբերյալ արտգործնախարարի ելույթի հետ:
«Եթե այս հարցերն իրենց լուծումը գտնեն, ապա մնացածը անցյալ է: Ես չեմ խոսել ինչ-որ կոնկրետ տարածքների մասին, այլ խոսել եմ եռանախագահող երկրների նախագահների կողմից արված հինգ հայտարարություններում պարունակվող երեք սկզբունքների ու վեց տարրերի մասին: Դրանք հենց, եռանախագահների բնորոշմամբ, մեկ ամբողջություն են ներկայացնում, եւ այս սկզբունքները կամ տարրերը տարանջատելը մեկը մյուսից անհնար կդարձնեն կարգավորումը, որը եւ փորձում է անել Ադրբեջանը»,-ասաց Էդվարդ Նալբանդյանը:
Նախարարը հիշեցրեց, որ իր ելույթում նա նշել է բազմաշերտ անվտանգության երաշխիքների մասին, մանրամասնորեն դրանց անդրադարձել:
«Չգիտեմ՝ ինչու, որոշ մարդկանց պետք են սենսացիաներ: Դրա կարիքը չունենք. մենք հանգիստ վարում ենք այն քաղաքականությունը, որը վարել ենք մինչև հիմա և որի արդյունքում մենք ասում ենք, որ մեր մոտեցումները համահունչ են եռանախագահող երկրների կողմից արված հայտարարություններին, որոնք մենք ընդունել ենք որպես հիմք՝ ճանապարհ դեպի կարգավորում, ինչից էլ Ադրբեջանը միշտ հրաժարվում է»,-ընդգծեց նախարարը:
