Կատալոնիայի խորհրդարանի՝ անկախությանը կողմ քվեարկելու որոշումը հանդիսանում է հանցավոր գործունեություն: Ինչպես փոխանցում է «Արմենպրես»-ը, վկայակոչելով «Ռիա-նովոստի»-ն, այդ մասին հայտարարել է Իսպանիայի վարչապետ Մարիանո Ռախոյը՝ իսպանական սենատում քվեարկությունից հետո:
«Այն, ինչ այսօր վավերացրել է Կատալոնիայի խորհրդարանը՝ հակասում է օրենքին և հանդիսանում է հանցավոր քայլ»,- ասել է Ռախոյը: Նա վստահեցրել է կատալոնացիներին, որ «ամեն ինչ լավ կլինի, չափավոր և արդյունավետ»: «Մենք պատրաստ չենք նրան, որ կան մարդիկ, ովքեր ցանկանում են լուծարել մեր սահմանադրությունը: Պետությունը կարձագանքի»,- ասել է վարչապետը:
Իսպանիայի Սենատը հավանության է արժանացրել Սահմանադրության 155-րդ հոդվածով նախատեսված դրույթները Կատալոնիայի նկատմամբ կիրառումը, ինչը ենթադրում է Մադրիդի կողմից Կատալոնիայի նկատմամբ ուղիղ կառավարման հաստատում:
