Ոստիկանության Երևան քաղաքի վարչության օպերատիվ կառավարման կենտրոն դեկտեմբերի 27-ին անհայտ քաղաքացուց ահազանգ է ստացվել, որ Գավառ քաղաքի Ազատության փողոցում վիճաբանություն է:

Ինչպես  տեղեկացրին ՀՀ ոստիկանության հասարակայնության հետ կապի և լրատվության վարչությունից, նույն օրը, ժամը 21.40-ին, հիվանդանոցից ոստիկանության Գավառի բաժնում հաղորդում է ստացվել, որ «կրծքավանդակի և որովայնի առաջնային պատի, աջ ճաճանչ-դաստակային հոդի շրջանի կտրած վերք» ախտորոշմամբ բուժօգնության են դիմել 1983 թվականին ծնված Էմին Կ.-ն և «պարանոցի թիկնային մակերեսի, ձախ թիկնային շրջանի և աջ երիկամի պրոէկգիազով ծակած կտրած վերք» ախտորոշմամբ` 1990 թվականին ծնված Կարեն Թ.-ն:

Մեկնած օպերատիվ խումբը պարզել է, որ նույն օրը, ժամը 21.00-ի սահմաններում, Կարեն Թ.-ն, իր վարած «ՎԱԶ-2113» մակնիշի ավտոմեքենան կանգնեցնելով Ազատության փողոցի սրճարանի մուտքի դիմաց, խոչընդոտել է քաղաքացիների ելք ու մուտքը սրճարան, ինչից առաջացել է վիճաբանություն, որի ժամանակ 1970 թվականին ծնված Սերգեյ Զ.-ն ծալովի դանակով հարվածել է վերջիններիս և պատճառել վնասվածքներ:

Ժամը 11.00-ին Սերգեյ Զ.-ն ներկայացել է ոստիկանության Գավառի բաժին, տվել հաղորդում և ներկայացրել հանցագործության գործիք ծալովի դանակը: Նշանակվել է դատաբժշկական փորձաքննություն: Դանակն առգրավված է: Կատարվում է քննություն: