Հոնդուրասի Հանրապետությունում ՀՀ դեսպան Արա Այվազյանը (նստավայրը՝ Մեխիկո) հունվարի 26-ին իր հավատարմագրերի պատճենը հանձնեց Հոնդուրասի Հանրապետության Արտաքին հարաբերությունների և միջազգային համագործակցության քարտուղար Մարիա Դոլորես Ագուեռո Լառային։ Այս մասինտեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:

Հավատարմագրերի հանձնման արարողությունից հետո տեղի ունեցած առանձնազրույցի ընթացքում քննարկվեցին Հայաստանի և Հոնդուրասի միջև երկկողմ քաղաքական, տնտեսական և մշակութային հարաբերությունների զարգացմանը, ինչպես նաև միջազգային կազմակերպություններում համագործակցությանն առնչվող հարցեր։ Մարիա Դոլորես Ագուեռո Լառան նշեց, որ ուրախ է ընդունել իր երկրում Հայաստանի առաջին դեսպանին՝ խոստանալով ամենայն աջակցություն Հայաստանի դիվանագիտական առաքելության աշխատանքին և երկու երկրների միջև հարաբերությունների սերտացմանը։

Դեսպան Այվազյանը նշեց, որ Հոնդուրաս է ժամանել այդ երկրի հետ Հայաստանի հարաբերությունները զարգացնելու դրական օրակարգով և հանձնառությամբ՝ հույս հայտնելով, որ համատեղ ջանքերով կգրանցվեն դրական արդյունքներ։

Հունվարի 27-ին դեսպան Այվազյանը մասնակցեց Հոնդուրասի վերընտրված նախագահ Խուան Օռլանդո Էրնանդես Ալվարադոյի պաշտոնի ստանձնման հանդիսավոր արարողությանը։