Ինչպես տեղեկացրել ենք, երեկ՝ հունիսի 10-ին, ՀՀ 18 համայնքներում կայացել են ՏԻՄ ընտրություններ. նրանցից 12-ում նաեւ համայնքապետ են ընտրել:
ԼՈւՐԵՐ.com-ը ներկայացնում է համայնքապետի ընտրությունների արդյունքները: Եւ այսպես՝
նախնական արդյունքներով, Կոտայքի մարզի Գետամեջ համայնքում նախկին գյուղապետը՝ Վարազդատ Մուրադյանը, 2 ձայնի տարբերությամբ վերընտրվել է։
Արարատի մարզում՝ Այգեզարդ համայնքում, 4 հոգի պայաքարել են համայնքապետի աթոռի համար։
Ընտրվել է Ազատ Ավետիսյանը. նախկին համայնքապետն իր քվեներով 3-րդ տեղում է եղել։
Նույն մարզի Գոռավան համայնքում վերընտրվել է Արսեն Բազիկյանը։
Գեղարքունքի մարզի Վանեվան գյուղում նույնպես վերընտրություն է եղել՝ հաղթել է գործող համայնքապետը։
Իսկ Տորֆավան համայնքում մեկ թեկնածու է եղել՝ Ահարոն Խաչատրյանը: Այստեղ 312 ընտրողից քվեարկությանը մասնակցել են 122-ը և բոլորը կողմ քվեարկել միակ թեկնածուին:
Արմավիրի մարզի Մարգարա համայնքում գյուղապետը պարտվել է՝ զիջելով մրցակցին՝ Էդգար Ենոքյանին։
Արագածոտնի մարզի Դավթաշեն գյուղում նույն պատկերն է՝ գործող գյուղապետը զիջել է Գևորգ Հովհաննիսյանին։
Իսկ նույն մարզի Դպրեվանք գյուղում 58 ընտրողից քվեարկությանը մասնակցել է 34-ը. նրանցից 23-ի կողմ քվեն բավարար է եղել, որպեսզի հաղթի Արամայիս Կասաբովը։
Մյուս համայնքում՝ Նոր Արթիկում, Վարդգես Ներսիսյանն է դարձել համայնքապետ։
Լոռու մարզի Գեղասար համայնքի ղեկավարն է Վարազդատ Գրիգորյանը, Անտառաշենում առաջադրվել է միայն Ռաֆիկ Խառատյանը. նա ստացել է ընտրությանը մասնակցած 73 ընտրողից 61-ի վստահության քվեն։