Հանրային ծառայությունների համարանիշ կամ նույնականացման ID քարտ ունեցող 18-65 տարեկան բոլոր անձանց համար տրվելու է հայտարարագիր, նրանք բոլորը դառնալու են հարկ վճարողներ: Այս մասին կառավարության հրապարակած տեսանյութում ասել է ՊԵԿ նախագահ Դավիթ Անանյանը:

Նա նաև տեղեկացրել է, որ ՊԵԿ-ը մտադիր է նույնականացման քարտերը դարձնել կուտակային:

«ID քարտերը համատարած հայտարարվելու են կուտակիչներ, պետությունը հայտարարելու է, որ սա կուտակիչ քարտ է։ Մենք բոլորին կբաժանենք ID քարտը «կարդալու» սարքավորում, այսինքն՝ հաշվիչ դրամարկղային մեքենան կնույնականացնի գնորդին, ու երբ դուք կգնաք օրվա հացը առնելու, դա ՊԵԿ-ում կգրանցվի որպես գնված արժեք։ Տարվա ընթացքում ինչքան որ գնումներ կատարենք, դրա համար առաջին տարում 1, երկրորդ տարում՝ 2, երրորդ տարում ամբողջ տարվա առեւտրի 3 տոկոսը կվերադարձնենք քաղաքացուն»,-ասել է Անանյանը։

Այսպիսով, ըստ ՊԵԿ նախագահի՝ յուրաքանչյուր քաղաքացի դառնալու է հարկ վճարող:

«Եվ ոչ միայն դա. ազգովի դառնում ենք ՀԴՄ կիրառման կանոնների նկատմամբ հսկողություն իրականացնող անձ»,-ասել է Դ. Անանյանը: