ՀՀ ազգային ժողովի նախագահ Արա Բաբլոյանն առաջիկա խորհրդարանական ընտրութուններին չի մասնակցելու, նա գնում է առողջապահության ոլորտ:
Նա այս մասին հայտնեց նոյեմբերի 7-ին ԱԺ-ում լրագրողների հետ զրույցում:
«Չեմ մասնակցելու ընտրություններին, որ երիտասարդներն առաջադրվեն: Գնում եմ առողջապահության ոլորտ: Չառաջադրվելու այլ պատճառ չկա: Ես 71 տարեկան եմ, բավական է, որքան գործունեություն եմ ծավալել քաղաքականությունում: Կարծում եմ, որ հիմա երիտասարդ և փորձառու մարդիկ պետք է մասնակցեն»,-ասաց Բաբլոյանը:
Նա ասաց, որ իր որդին ևս չի առաջադրվելու: Բաբլոյանը նշեց, որ ինքը հանրապետական կուսակցությանն անդամագրվել է միայն նրա համար, որ կուսակցությունը մոնոպոլիզմի, կոռուպցիայի դեմ պայքարի ճանապարհով էր գնում: «Ես եղել եմ իշխանության մեջ, կառավարության անդամ 1991-ից, սակայն կուսակցություն մտել եմ միայն ԱԺ-ում լինելու ժամանակ: Կուսակցություն չեմ մտել ինչ-որ պաշտոն ստանալու համար: Կարծում եմ, համոզվել եք, որ ինձ համար պաշտոնը նրա համար էր պարզապես, որ ծրագրերը ճիշտ ձևով առաջ տանեի»,-նշեց նա:
Հարցին, թե հիմա ՀՀԿ-ն ընդդիմությո՞ւն է, նա ասաց, որ ընդդիմություն են դառնում, երբ լինում են փոքրամասնություն, ընտրությունների ավարտից հետո պարզ կդառնա: Բաբլոյանը նկատեց, որ հանրապետական կուսակցությունն առաջիկա ընտրությունների համար ունի լուրջ մարդկային և մասնագիտական պոտենցիալ: Հարցին, թե հնարավո՞ր է, արդյոք, որ ՀՀԿ-ն գա խորհրդարան, վերափոխվի, Բաբլոյանը պատասխանեց՝ ինչու ոչ:
