Արցախի անվտանգության խորհրդի քարտուղար Վիտալի Բալասանյանը ՀՀ Զինված ուժերը ամբողջ հայ ազգի պարծանքն է համարում:
«Արմենպրես»-ի հաղորդմամբ՝ լրագրողների հետ զրույցում նա նշեց, որ հունվարի 28-ը Հայաստանի Հանրապետության և ամբողջ հայության ամենակարևոր տոներից մեկն է:
«Ամենածանր պայմաններում մենք կարողացանք կառուցել այն, ինչ այսօր ունենք և բոլորս համարում ենք մեր պարծանքը: Շնորհավորում եմ և գլուխ եմ խոնարհում նրանց առաջ, ովքեր այսօր ֆիզիկապես չկան: Հենց այդ նահատակների առաջ մեր պարտավորվածություններն ավելի են մեծացել ու մենք պատրաստ ենք անել ամեն ինչ: Պետականությունը պահպանելու համար մեր ժողովուրդը կամք, ուժ ու կորով պետք է ունենա: Ուզում եմ համայն հայությանը շնորհավորել, սա բոլորիս աշխատանքն է»,- նշեց Բալասանյանը:
Հունվարի 28-ը Հայկական զինված ուժերի կազմավորման օրն է, այն 27 տարեկան է: 1992թ. հունվարի 28-ին Կառավարությունը ընդունեց «Հայաստանի Հանրապետության Պաշտպանության նախարարության մասին» պատմական որոշում` դրանով իսկ իրավականորեն ազդարարելով Հայոց Ազգային բանակի ստեղծումը: 1992թ. մայիսին պաշտպանության նախարարությունը սկսեց առաջին զորակոչը հանրապետության տարածքում` հիմք դնելով բանակը ժամկետային զինծառայողներով համալրելու կայուն ավանդույթին:
