Շիրակի նախկին մարզպետ Կարեն Սարուխանյանի՝ պատգամավորական մանդատը վերցնելուց հետո մարզպետի պաշտոնը թափուր է մնացել։ Տեւական ժամանակ է Շիրակի մարզում, որպես մարզպետի հավանական թեկնածուներ խոսվում է փոխմարզպետ Վարդան Գրիգորյանի, ինչպես նաեւ Երեւանի փոխքաղաքապետ Տիգրան Վիրաբյանի հնարավոր նշանակման մասին։
Սակայն Irakanum.am-ի ունեցած տեղեկություններով, վերը նշված անձինք մարզպետի պաշտոնում չեն նշանակվելու։ Միաժամանակ տեղեկություններ կային, որ Շիրակի մարզպետի պաշտոնը զբաղեցնելու է «Իմ քայլը» դաշինքի կողմից ռեյտինգային ընտրակարգով մասնակցած ու զգալի ձայներ՝ 4541 քվե ստացած Տիգրան Պետրոսյանը։ Հնարավոր այս նշանակումը եւս իշխանական մեր աղբյուրները հերքում են։
Շիրակի մարզպետի նոր թեկնածուի անուն է շրջանառվում իշխանական կուլիսներում։ Խոսքը Սպորտի եւ երիտասարդության հարցերի նախկին նախարար Լեւոն Վահրադյանի մասին է։ Վերջինս ծնունդով Շիրակի մարզի Արթիկ քաղաքից է։ Վահրադյանը նախարար էր նշանակվել ԲՀԿ քվոտայով։