Ինչպես արդեն տեղեկացրել էինք, Ազգային ժողովում սպասարկմամբ և մաքրությամբ զբաղվող աշխատակիցները բողոքի ակցիա էին իրականացնում:
Նրանց առաջարկվել է աշխատել նոր պայմանագրով, որի համաձայն նրանք դառնալու են «Քլիներս» ՍՊԸ-ի աշխատակիցներ իսկ Ազգային ժողովում իրենց աշխատավարձերը լինելու են 40.000` նախկին 65.000 դրամի փոխարեն: Աշատակիցները նշում են, որ նոր պայմանների հետ համաձայն չեն և պատրաստ են իրենց բողոքը շարունակել՝ չմաքրելով Ազգային ժողովի շենքը:
Նրանց հետ հանդիպեց «Լուսավոր Հայաստան» խմբակցության ղեկավար Էդմոն Մարուքյանը՝ խոստանալով, նրանց բողոքը հասցնել Աժ նախագահ Արարատ Միրզոյանին:
Նշենք նաև, որ աշխատակիցները խնդրի շուրջ հանդիպել են նաև Ազգային ժողովի փոխնախագահ Ալեն Սիմոնյանին:
ԼՈւՐԵՐ.com-ի հետ զրույցում աշխատակիցները ասացին, թե Ալեն Սիմոնյանն իրենց ասել է, որ բողոքի փոխարեն պիտի շնորհակալ լինեն, որ իրենք չեն կրճատվում աշխատանքից՝ այլ նոր պայմաններով գոնե աշխատանքի են անցնում:
Մեզ հետ զրույցում, Ալեն Սիմոնյանը դա ոչ հերքեց, ոչ հաստատեց՝ նշելով, որ չի ցանկանում որևէ մեկնաբանություն տալ և նման հարցերով այլևս չմոտենան իրեն: