Երեկ՝ ապրիլի 9-ին, «Քեվօրք և Անիթա Փակումեանների հիշատակի «Հիսուսի Մանուկներ» առողջության կենտրոն»-ից ոստիկանության Բաղրամյանի բաժին ահազանգ է ստացվել, որ 17-18 շաբաթական հղիությամբ իրենց մոտ է տեղափոխվել 17-ամյա Կ. Շ.-ն, 16-17 շաբաթական հղիությամբ՝ 18-ամյա Գ. Մ.-ն և 8-9 շաբաթական հղիությամբ՝ 17-ամյա Լ. Կ.-ն։
Ոստիկանությունը պարզում է անչափահաս աղջիկների հղիության պատճառները։ Տեղեկությունը ԼՈՒՐԵՐ․com-ի հետ զրույցում հաստատեց ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը։
«Կենտրոնից ունենք գրություն ստացված, որ իրենց հսկողության տակ են գտնվում 3 անչափահասներ, որոնք գտնվում են հղիության տարբեր շրջաններում: Ոստիկանության Բաղրամյանի բաժնում նյութեր են նախապատրաստվում»,- ասաց Ջանոյանը։
Մեզ հետ զրույցում կենտրոնի ղեկավար Գագիկ Հարությունյանը նշեց, որ կենտրոնը սպասարկում է Արմավիրի մարզի Բաղրամյանի տարածաշրջանի 14 գյուղի։ Նրանք տարբեր գյուղերից են և միմյանց հետ կապ չունեն։ Նա նշեց՝ որևէ արտառոց բան չկա․ նրանք գուցե ամուսնացած կամ փախցրած աղջիկներ են․ «Աղջիկներից երկուսը նույնիսկ սկեսուրների հետ են եկել կենտրոն: Երեքից մեկն ազգությամբ եզդի է։ Նրանցից երկուսը մի քանի ամսից են չափահաս դառնալու, բայց քանի որ դեռ անչափահաս են, օրենքով սահմանված կարգով՝ հաղորդում ենք ներկայացրել ոստիկանություն ու մարզային դատախազություն», - նշեց կենտրոնի ղեկավարը:
