Հետաքրքիր իրավիճակ է այս օրերին Պետական վերահսկողական ծառայությունում։ Դավիթ Սանասարյանի լիազորությունների դադարելուց հետո, ինչպես արդեն տեղեկացրել էինք ՊՎԾ ղեկավարի ժամանակավոր պաշտոնակատար է նշանակվել ՊՎԾ պետի տեղակալ Ալբերտ Աբգարյանը։ Առավոտյան Armdaily.am-ի հետ զրույցում Աբգարյանը հաստատել էր այդ փաստը։ Մեր ունեցած տեղեկություններով սակայն, Աբգարյանի նշանակումը անբացատրելի պատճառներով դուր չի եկել Կառավարության աշխատակազմի ղեկավար Էդուարդ Աղաջանյանին, ով ամեն գնով փորձում է կառույցի ժամանակավոր պաշտոնակատար նշանակել տալ Սանասարյանի տեղեկալներից՝ Արգիշտի Քյարամյանին։ Նշենք սակայն, որ օրենքը թույլ է տալիս Քյարամյանին նշանակվել միայն այն դեպքում, եթե ավելի մեծ ստաժ ունեցող Ալբերտ Աբգարյանը հրաժարվի ժպ լինել։ Մեզ հասած տեղեկությունների համաձայն՝ Արգիշտի Քյարամյանին ՊՎԾ պետի տեղեկալ նշանակելու որոշումը բավական երկար է կայացվել, մասնավորապես մեկ ամիս շարունակ նրա նշանակման հարցը հարցականի տակ է եղել, հատկապես հաշվի առնելով այն հանգամանքը, որ ՔյարամյանըՊԵԿ աշխատակից էր և նրա աշխատանքով ՊԵԿ-ում համենայն դեպս հիացած չեն եղել։ Թե ինչն է դրդում Էդուարդ Աղաջանյանին այդ կարևոր պաշտոնին ամեն գնով նշնակել տալ հենց Քյարամյանին անհասկանալի է։ Տեղեկատվության վերաբերյալ փորձեցինք հավաստիանալ նաև Էդուարդ Աղաջանյանից, ով սովորության համաձայն հեռախոսազանգերին այդպես էլ չպատասխանեց։
