Արմավիրի մարզի բնակիչների թունավորման գործով կեղծ օղի պատրաստելու մեջ մեղադրվող Աշոտ Հովսեփյանն այսօր՝ դեկտեմբերի 17-ին, դատարանի որոշմամբ 2 միլիոն ՀՀ դրամ գրավի դիմաց ազատ արձակվեց։ Այս մասին ֆեյսբուքան իր էջում գրել է Հովսեփյանի պաշտպան Գոռ Գեւորգյանը։

«Հաղթանակ ու երկար սպասված, «Օղու գործով» պաշտպանյալս` Աշոտ Հովսեփյանն ազատ արձակվեց»,- գրել է նա։

Հիշեցնենք, որ Աշոտ Հովսեփյանը մեղադրվում է ՀՀ ՔՕ 207-րդ հոդվածի 2-րդ մասով՝ կեղծ օղի արտադրելու կամ իրացնելու համար, որն անզգուշությամբ առաջացրել է մարդու մահ կամ ծանր հետեւանքներ:

Արմավիրի մարզի ընդհանուր իրավասության դատարանը՝ դատավոր Արմեն Հովհաննիսյանի նախագահությամբ, սեպտեմբերի 9-ին նրան կալանավորելու որոշում էր կայացրել՝ արձանագրելով, որ առկա է հիմնավոր կասկած առ այն, որ Հովսեփյանը առնչվում է իրեն առաջադրված մեղադրանքին: Դատարանը միաժամանակ նշել էր, որ ազատության մեջ մնալու դեպքում վարույթն իրականացնող մարմնից ապացույցներ թաքցնելու կամ փախուստի դիմելու ռիսկեր առկա չեն, այլ առկա է միայն գործով անցնող անձանց վրա անօրինական ազդեցություն գործադրելու ռիսկը: