Ինչպես արդեն տեղեկացրել ենք, մահացել է պատերազմում հերոսաբար զոհված Արտաշես Ջանիբեկյանի նորածին որդին՝ Մոնթեն: Նա ծնվել էր հոր զոհվելուց յոթ օր հետո։

«Երեխան ծնվել էր հոկտեմբերի 18-ին, բայց վաղաժամ՝ 31 շաբաթական: Ուներ որոշ խնդիրներ, րոպեներով շունչը պահում էր, որովայնի խոռոչում ինֆեկցիա ուներ: Պայքարեցինք, սակայն անարդյունք»,- ԼՈՒՐԵՐ.com-ի հետ զրույցում ասաց Արտաշեսի կինը՝ Լուսինե Սարդարյանը:

Երեխան մահացել է ծնվելուց երկու ամիս անց, նա զույգի 3-րդ, սակայն միակ արու զավակն էր: Արտաշեսն ունի երկու դուստր՝ 2 և 5 տարեկան:

Լուսինեն ասում է՝ շատ երկար են սպասել Մոնթեի լույս աշխարհ գալուն. «Տղայիս անունը ամուսինս էր որոշել: Նա կյանքիս նոր իմաստ էր տվել, բայց, ավաղ...»:

Նշենք, որ Արտաշես Ջանիբեկյանը Գեղարքունիքի մարզի Ակունք գյուղից էր, 7 տարի շարունակ պայմանագրային զինծառայող է եղել:

Արփինե Հակոբյան