Lragir.am. Հայաստանի գլխավոր դատախազության 95-ամյակի հանդիսավոր միջոցառումներն ինչ որ առումով հիշեցնում էին Աղվան Հովսեփյանին վաստակած հանգստի ուղարկելու արարողություն: Սեպտեմբերին լրանում է նրա լիազորությունների ժամկետը, եւ թեեւ նրա տարիքն ամենեւին էլ թոշակային չի լինի՝ 60 տարեկան, Սերժ Սարգսյանն ըստ ամենայնի դեռ որոշում չունի՝ նրան նշանակել, թե ոչ:
Աղվան Հովսեփյանը Սերժ Սարգսյանի համար անփոխարինելի է: Նրա կարողությունը՝ սպունգի պես ներծծել ամեն ինչ եւ ներսում պահել հսկայական տեղեկատվությունը, կարող է չափազանց թանկ արժենալ: Բացի այդ, դատելով վերջին խորհրդակցությունից, Սերժ Սարգսյանը պաշտոնյաների մեջ ամենաշատ գնահատում է այն, որ նրանք քաղաքական գնահատականներ չտան: Իսկ Աղվան Հովսեփյանը ոչ միայն քաղաքական, այլեւ նույնիսկ իրավական գնահատականներ չի տալիս:
Ոչ ոք չգիտե, թե ինչպիսի վերաբերմունք ունի Աղվան Հովսեփյանն աղմկոտ գործերին, որոնք նրա գերատեսչությունում են: Ոչ ոք չգիտե, թե ինչ ունի նա պահուստում, այն դեպքի համար, եթե ԲՀԿ-ն խորհրդարանում պահանջի վերականգնել Վարդան Օսկանյանի պատգամավորական անձեռնմխելիությունը:
Աղվան Հովսեփյանը որեւէ բան չի խոսել նաեւ Տիգրան Սարգսյանի օֆշորային սկանդալի մասին: Նա միայն զգուշացրել է իր կիպրացի գործընկերոջը, որպեսզի նա պատրաստ լինի տարբեր բնույթի հարցերի:
Ճիշտ է, կիպրացի գործընկերը վարչապետի համար բավական տհաճ հայտարարություն արեց, միեւնույն ժամանակ ասելով, որ չի ուսումնասիրել բոլոր փաստերը: Ուսումնասիրելուց հետո կարող է «պարզվել», որ վարչապետին օֆշորում գրանցել են լիազորագրով, որը տրվել է այլ գործի համար: Նման փաստաթուղթը լիովին կարող է հայտնվել:
Խորհրդակցության ժամանակ Սերժ Սարգսյանը պաշտպանեց դատախազությանը, Իշխան Զաքարյանին ասելով, թե ոչ մեկին հետաքրքիր չէ նրա կարծիքը դատախազության մասին: Սակայն, թերեւս շատերին հետաքրքրում է հենց Սերժ Սարգսյանի կարծիքը դատախազության մասին: Արդյոք նա համարում է, որ գլխավոր դատախազը պետք է լինի այնպիսին, ինչպիսին Աղվան Հովսեփյանն է:
Իշխանության ներկայիս համակարգի պայմաններում գլխավոր դատախազը առանցքային պաշտոն է: Հենց նա է այն բանալին, որով բացում կամ փակում են ստվերային տնտեսության եւ քաղաքականության դռները: Հայաստանում այդ դռները համառորեն փակում են: Աղվան Հովսեփյանը հիանալի է կատարում այդ առաքելությունը:
