ԳԱԼԱ-ի գրավոր հարցմանն արձագանքել է Կիպրոսում գործող "Transinc Global Services" ընկերությունը: Այն խոշոր մասնագիտացված բիզնես կազմակերպություն է:

Կառույցը զբաղվում է օֆշորային ընկերությունների գրանցմամբ՝ Կիպրոսում: "Transinc Global Services" –ի մասնագետներն օգնում են անհատներին հիմնել օֆշորային ընկերություններ:

Ընկերությանն ուղարկված հարցմամբ փորձել էինք պարզել, թե հնարավո՞ր է առանց անձի իմացության Կիպրոսում դառնալ օֆշորային ընկերության բաժնետեր:
Կա՞ն նման եղանակներ, թե՞ այնուամենայնիվ բացառված է, որ առանց քաղաքացու իմացության նման գործարքներ տեղի ունենան:

"Transinc Global Services"-ի գործադիր տնօրեն Շարրոն Ջորջիադուն ի պատասխան գրել է. «Ոչ, հնարավոր չէ: Նրանք կորպորատիվ ծառայություններ մատակարարողին պետք է ապահովեն պատշաճ տեղեկություններով, նախ պետք է ներկայացնեն նոտարով հաստատված անձնագրի կրկնօրինակը, բանկային մի շարք փաստաթղթեր: Հարկավոր է նաեւ կազմակերպության ներսում որոշ փաստաթղթեր լրացնել»:

"Transinc Global Services"-ի գործադիր տնօրենը նման գործարքի իրականացման միայն մեկ եղանակ է մատնանշում: Մեջբերենք նրա գրառումը. «Եթե ինչ-որ մեկին տրված է եղել լիազորագիր եւ կողմը կատարված գործարքի մասին չի տեղեկացրել անձին»:

Եթե պարզվի, որ իրականում տեղի է ունեցել հանցավոր գործարք, հնարավո՞ր է որ Կիպրոսում գործող իրավապահ մարմինները միջամտեն կատարվածին հարցին, Շարրոն Ջորջիադուն գրել է.«Հնարավոր է, եթե նրանց դեմ քրեական գործ հարուցվի»:

Արմենուհի Վարդանյան