ԳԱԼԱ-ն զրուցեց Սյունիքի թիվ 38 ընտրատարածքում առաջադրված ՀՀԿ-ական թեկնածու, Կապանի նախկին քաղաքապետ Արմեն Կարապետյանի հետ.
-Պրն. Կարապետյան, ի՞նչ եք մտածում՝ թիվ 38 ընտրատարածքում Ձեզ կհաջողվի հաղթել:
-Դե եթե չմտածեի, չէի առաջադրվի:
-Իսկ Ձեր համոզմունքը կապ ունի՞ այն հանգամանքի հետ, որ ՀՀԿ-ն է Ձեզ առաջադրել:
-Այո, այո, լավ կլինի:
-Այսինքն մտածում եք, որ վարչական ռեսուրսը կաշխատի Ձե՞ր օգտին:
-Չէ, ինչի՞ ռեսուրսը, մեր ժողովուրդը ում ուզում ա, նրան էլ ընտրում ա:
-Որ ՀՀԿ-ն է Ձեզ առաջադրել, Ձեր օգտին չի՞ աշխատի:
-Ինչի՞ չի աշխատի, իհարկե կաշխատի:
-Առաջադրված մյուս թեկնածու Սամվել Հայրապետյանը համոզված է, որ ինքն է հաղթելու:
-Դե թող հաղթի, ժամանակը գա, ամեն ինչ կերևա:
-Նախագահական ընտրությունների ժամանակ Ժառանգությունը հաղթել է Կապանում, իսկ առաջադրված թեկնածուն էլ նախկին ազատամարտիկ է, չե՞ք վախենում, որ կպարտվեք:
-Ժամանակը կգա, կտեսնենք:
-Իսկ այն հանգամանքը, որ ինքը նախկին ազատամարտիկ է, մտավախություն չկա՞, որ ավելի շատ ձայներ կարող է ստանալ:
-Ժամանակը կգա, կիմանաք:
-Պրն. Կարապետյան, շատերը խոսում են այն մասին, որ Սյունիքի նախկին մարզպետն է առաջարկել Ձեր թեկնածությունը՝ ելնելով Ձեր լավ հարաբերություններից:
-Իմ թեկնածությունը առաջադրել է կուսակցությունը:
-Իսկ նախկին մարզպետի հետ մտերիմ չե՞ք:
-Ես ոչ միայն նախկին մարզպետի, այլև նոր մարզպետի հետ եմ մտերիմ:
-Շատերն ասում են, որ Դուք Խաչատրյանի կողմից առաջադրված թեկնածու եք, և վերջինս ցանկանում է Ձեր միջոցով ինչ-ինչ հարցեր լուծել:
-Ոչ միայն Սուրեն Խաչատրյանը, այլև ոչ մեկը իր կամքը չի կարա ինձ թելադրի. մենակ ժողովուրդը, ինձ ընտրողները կարան թելադրեն:
-Մտածու՞մ եք, որ ժողովուրդը Ձեզ կընտրի՝ անկախ նրանից, թե որ կուսակցությունն է Ձեզ առաջադրել:
-Շատ եմ համոզված:
-Գորիսի դեպքերի հետ կապված ի՞նչ կասեք:
-Հարցը իրավապահ մարմինների մոտ է, եթե շատ եք ուզում իմանալ, զանգեք իրավապահ մարմիններին, իրանք կասեն:
Սեդա Ղուկասյան
