ՀՀ ԱԺ փոխնախագահ, ՀՀԿ մամուլի խոսնակ Էդուարդ Շարմազանովը Tert.am-ի հետ հարցազրույցում անդրադարձել է ԵՄ Ասոցացման համաձայնագրի տեքստի հրապարակայնացման մասին պահանջին, սպասվելիք սահմանադրական փոփոխություններին, ինչպես նաև պատասխանել հարցին, թե որպես Երևանի ավագանու ընտրություններին Հանրապետական կուսակցության ավագանու նախընտրական շտաբի պետ ինչ կարծիք ունի Երևանի քաղաքապետարանի՝ տրանսպորտի թանկացման կասեցման որոշման՝ Տարոն Մարգարյանի վարկանիշի վրա ազդեցության վերաբերյալ:

-Պարոն Շարմազանով, քաղաքագիտական և այլ շրջանակներից հստակ «մեսիջներ» են հղվում, որ հրապարակե՛ք նախաստորագրվելիք ԵՄ Ասոցացման համաձայնագրի տեքստը:

- Թե՛ քաղաքագիտական շրջանակների, թե՛ քաղաքական կուսակցությունների, նաև պառլամենտական կուսակցությունների ներկայացուցիչները շատ լավ պետք է գիտակցեն, որ յուրաքանչյուր միջազգային փաստաթուղթ անցնում է վավերացման գործընթաց: Երբ ժամանակը գա, նախաստորագրվի, այդ ժամանակ որպես միջազգային փաստաթուղթ այն կբերվի Ազգային ժողով՝ վավերացման:

Պետք չէ շտապել: Ասեմ, որ որոշ մարդիկ իրենց գցում են շատ հետաքրքիր իրավիճակի մեջ. տեսական կարծիքներ են արտահայտում, հետո փորձում հերքել կամ հաստատել դրանք: Կրկնում եմ՝ կբերվի՞ փաստաթուղթը ԱԺ, այդ ժամանակ քաղաքական ուժերը, պատգամավորները կարող են իրենց կարծիքները արտահայտել: Եվ կարծում եմ՝ ուրբաթը չհասած շաբաթի մասին պետք չէ մտածել:

-Ո՞ւշ չի լինի արդեն:

- Ինչի՞ց պետք է ուշ լինի:

-Նկատի ունեմ, որ հանրությունը այդ փաստաթուղթը չմարսած, հարցը կդրվի քննարկման և քվեարկության:

-Դրա համար գոյություն ունեն պետական ինստիտուտներ, և Ազգային ժողովը դրանց թվում է: ԱԺ-ն հենց այդ հանրության ներկայացուցչական մարմինն է: Հասարակությունն է խորհրդարանում ներկայացված քաղաքական ուժերին լիազորել իրենց շահերը պաշտպանել:

-Նույն համատեքստում ևս մի բան. ԱԺ-ում ՀՀ նախագահի նախկին ներկայացուցիչ Գառնիկ Իսագուլյանը հայտարարում էր, որ երեք համապետական ընտրություններին նախորդած քարոզարշավի ընթացքում խոսք չի եղել Ասոցացման համաձայնագրի մասին, և հանկարծ՝ ամպրոպ պարզ երկնքում՝ Ասոցացման համաձայնագիր:

-Ինչպես յուրաքանչյուր քաղաքական գործիչ, այնպես էլ Իսագուլյանը իրավունք ունի իր կարծիքը արտահայտելու: Բայց կառաջարկեի, որ ուշադիր կարդան իշխող քաղաքական կուսակցության և նրա թեկնածուի նախընտրական ծրագրի «արտաքին քաղաքականություն» բաժինը և կտեսնեն, որ մշտապես կողմնակից ենք եղել «և՛, և՛»-ի քաղաքականությանը: Եվ այդ նույն տարիների ընթացքում բազմաթիվ անգամ նշել ենք, որ պետք է խորացնենք մեր հարաբերությունները մեր ռազմավարական դաշնակից Ռուսաստանի՝ ռազմական, քաղաքական, տնտեսական համագործակցության տիրույթում և միաժամանակ պետք է խորացնենք մեր հարաբերությունները մեր եվրոպացի գործընկերների հետ: Եվ Ասոցացման համաձայանգրի հետ կապված բանակցությունները կամ եվրոպական այս կամ այն կառույցի հետ քննարկումները, այսինքն՝ տնտեսական համագործակցության խնդիրները, այսօր չէ, որ ծնվել են: Եվ դա եղել է բոլորի աչքի առաջ: Մեր արտաքին քաղաքականությունը, հիշեցնե՛մ, խարսխված է եղել մի շարք հարցերի շուրջ: Հարց համար 1. Լեռնային Ղարաբաղի անկախությունը այլընտրանք չունի, հարց համար 2. Հայաստանը հետևողականորեն ձեռնամուխ է լինելու Հայոց ցեղասպանության միջազգային ճանաչմանը և հարց համար 3. Հայաստանը շարունակում է խորացնել համագործակցությունը մեր ռազմավարական գործընկեր Ռուսաստանի հետ թե՛ ՀԱՊԿ, և թե երկկողմ շրջանակներում, ինչպես նաև զարգացնում ենք տնտեսական-քաղաքական հարաբերությունները մեր եվրոպացի գործընկերների հետ:

-Պարոն Շարմազանով, հայտարարվում է՝«աշունը թեժ է լինելու»:

-Կարծում եմ՝ բոլոր պետություններում էլ քաղաքական աշունները պետք է թեժ լինեն, որովհետև քաղաքական ուժերը արձակուրդից վերադառնում են: Նայած՝ թեժ ասելով ով ինչ է հասկանում: Եթե քաղաքական ուժերը պետք է բովանդակային, լուրջ քննարկումներ կազմակերպեն օրինագծերի հետ կապված, միայն կողմ կլինեմ: Իսկ եթե նկատի ունեք, որ որևէ մեկի մտքով կարող է անցնել այլ գործողությունների գնալ, բնականաբար, դա լուրջ չէ:

-Հստակեցնեմ՝ հայտարարվել են դասադուլներ ուսման վճարների հետ կապված, կանխատեսվում է սոցիալական բողոքի ալիք՝բարձրացված գազի աշնանային վճարումներից հետո, քաղաքական ուժերի ակտիվացում՝ ԵՄ Ասոցացման համաձայնագրի նախաստորագրման համատեքստում:

-Իրենք քննադատում են, մենք պետք է աշխատենք, և քննադատելը շատ ավելի հեշտ է, քան աշխատելը: Մեր խնդիրը աշխատելն է, իրականացնելն է մեր նախընտրական ծրագիրը, որպեսզի բարելավենք ժողովրդի իրավիճակը, առկա սոցիալական վիճակը՝ պարբերաբար բարձրացնենք թե՛ մինիմալ աշխատավարձը, թե՛ տնտեսական խնդիրներ լուծենք: Եվ նորություն չէ, որ յուրաքանչյուր սեպտեմբերին ընդառաջ տարբեր տիպի հայտարարություններ լինում են: Եվ ինձ համար անհասկանալի կլիներ, եթե ընդդիմությունը չքննադատեր:

-Պարոն Շարմազանով, Հայաստանի հանրապետական կուսակցության ներկայացուցիչներից ԱԺ պետաիրավական հանձնաժողովի նախագահի կողմից արդեն իսկ հայտարարվում է, որ սահմանադրական փոփոխությունների աշխատանքային խումբ է ստեղծվելու: Սակայն նշվում է, որ այս պահին դրված չէ կառավարման համակարգի փոփոխման հարց: Դուք հնարավոր համարո՞ւմ եք սահմանադրական փոփոխությունների համատեքստում կիսանախագահական կառավարման համակարգից անցումը պառլամենտականին:

-Այն, որ երկրում կա սահմանդրական բարեփոխումների անհրաժեշտություն, մեկ անգամ չէ, որ նմանատիպ կարծիք հայտնվում է: Բայց ի՞նչ կոնտեքստում կլինեն այդ փոփոխությունները, ինչպիսի՞ն՝ ես Դավիթ Հարութունյանի ասածին ավելացնելու բան չունեմ: Մի բան կարող եմ ասել, եթե մեզ մոտ պաշտոնապես լինի քաղաքական քննարկում, կտեղեկացնենք:

-Պարոն Շարմազանով, բայց ժամանակին ՀՀԿ-ն դեմ էր՝ ինչպես հարյուր տոկոս համամասնական ընտրակարգին, այնպես էլ պառլամենտական կառավարմանն անցնելու ՀՅԴ և «Ժառանգության» առաջարկներին:

-Այո, Հանրապետական կուսակցությունն այն ժամանակ ասում էր, որ այն ժամանակ ժամանակը չէ: Այսինքն՝ նախագահական ընտրություններից առաջ ընտրական օրենսգրքի բարեփոխումը նպատակահարմար չէ: Մշտապես ասվել և ասվում է, որ խնդիրը ոչ թե ձևի, այլ բովանդակության մեջ է: Կրկնում եմ, կուսակցության Գործադիր մարմնում այդ բարեփոխումների հետ կապված որևէ պաշտոնական քննարկում դեռևս չի եղել:

- Պարոն Շարմազանով, Երևանի ավագանու ընտրություններում Երևանի քաղաքապետ Տարոն Մարգարյանի շտաբի պետն էիք: Ամառվա ընթացքում «ոչ 100 դրամ»-ի բողոքի ալիքի արդյունքում ժամանակավորապես կասեցվեց տրանսպորտի թանկացումը: Չե՞ք կարծում, որ Տարոն Մարգարյանի վարկանիշն այս ընթացքում ընկավ:

- Յուրաքանչյուր քաղաքական թիմ ոչ թե վարկանիշացավով պետք է տառապի, այլ խնդիրների լուծմամբ, ծրագրերով պետք է զբաղվի: Իսկ շտաբի պետի խնդիրը եղել է լավագույնս կազմակերպել թեկնածուի և կուսակցության աշխատանքները նախընտրական ժամանակաշրջանում: Եվ երևանցիների տված ձայները մեր կուսակցության ավագանուն՝ շուրջ 56 տոկոս, դրա վառ ապացույցն է: Իսկ թե ինչպես կընդունեն երևանցիները այդ բարեփոխումները մայրաքաղաքում, կերևա չորս տարի անց: Կարծում եմ, որ Երևանի ընտրված քաղաքապետի և երևանցիների միջև միջնորդներ անհրաժեշտ չեն: