«Ժամանակ» օրաթերթի այսօրվա համարում «Նոբելյան մրցանակ «վ ստուդիո»» վերտառությամբ հոդվածում աղավաղվել են իմ խոսքերը:

Թերթը, հղում անելով «Ազատություն» ռադիոկայանին, մասնավորապես գրում է.

«Ազգային ժողովի փոխնախագահ Էդուարդ Շարմազանովը հայտարարել է, որ Մաքսային միություն մտնելու որոշումը բխում է համայն հայության շահերից: Իսկ երբ «Ազատություն» ռադիոկայանը խնդրել է կոնկրետացնել, Շարմազանովն ասել է, որ կոնկրետ կքննարկենք, երբ որ կինի ամբողջական ինֆորմացիան: Փաստորեն, Շարմազանովը ամբողջական ինֆորմացիա չունի, բայց հայտարարում է, որ Մաքսային միությունը բխում է համայն հայության շահերից»:

Մինչդեռ «Ազատություն» ռադիոկայանի հետ հարցազրույցում /http://www.azatutyun.am/content/article/25116043.html/ հնչած հարցն ու պատասխանը այլ համատեքստում են: Ներկայացնում ենք այն ստորեւ:

«Ազատություն»․ - Երբ որ խոսվում է անվտանգության մասին, բնականաբար, բոլորն էլ հասկանում են, որ հարցը վերաբերում է Լեռնային Ղարաբաղին: Հանրապետականները իրենց զրույցներում մինչև սեպտեմբերի 3-ը նշում էին, որ եթե Մաքսային միություն մտնելու հարց լինի, ապա նաև պետք է քննարկվի Ղարաբաղի խնդիրը: Արդյո՞ք այս հարցերը նաև հաշվի են առնվել այդ քաղաքական որոշումը կայացնելիս:

Շարմազանով․ - Այդ իմաստով ես մի բան կարող եմ ասել (փակագծերը շատ չբացեմ), որ այս միություն մտնելու հայտարարությունը բխում է հայության, այդ թվում արցախահայության շահերից, և ես նաև դրական եմ գնահատում Արցախի վարչապետի հայտարարությունը, որ սա դրական էր Արցախի համար և սա պատմական որոշում էր:

Հ. Գ. Հուսամ, «Ժամանակի» հոդվածն ընդամենը հեղինակի թյուրըմբռնման արդյունք է եւ ոչ իրականությունն աղավաղելու դիտավորություն:
Շփոթության մեջ ընկածների համար կրկնում եմ համոզմունքս, որ անվտանգ Արցախի գոյությունը բխում է ողջ հայության շահերից: Ավելին' մոլորության մեջ են նրանք, ովքեր տարանջատում են արցախահայության եւ համայն հայության շահը:

Հարգանոք'
ՀՀ ԱԺ փոխնախագահ
ԷԴՈՒԱՐԴ ՇԱՐՄԱԶԱՆՈՎ