Թաիլանդի բանակի հրամանատարությունը ռազմական դրություն է հայտարարել՝ նպատակ ունենալով «պաշտպանել օրինականությունն ու կարգը» քաղաքական ճգնաժամ ապրող երկրում, տեղեկացնում է BBC-ն:
Զինվորականներն ստանձնել են իշխանական լայն լիազորություններ, որոնք, նրանց կարծիքով, անհրաժեշտ են հանգստությունն ու կայունությունն ապահովելու համար: Թաիլանդի կառավարության եւ դիտորդների համար այս քայլն անսպասելի է եղել:
Թաիլանդի կառավարության ղեկավարի անվտանգության հարցերով գլխավոր խորհրդականը հայտարարել է, որ երկրի իշխանությունների հետ ոչ ոք չի խորհրդակցել ռազմական դրություն հայտարարելու հարցի շուրջ:
Զինվորականները, որոնք վերջին անգամ Թաիլանդում իշխանությունն իրենց ձեռքն են վերցրել 2006 թվականին, պնդում են, որ իրենց գործողությունը չպետք է դիտվի որպես պետական հեղաշրջում:
Թաիլանդում ռազմական դրություն է մտցվում արդեն մի քանի ամիս շարունակվող քաղաքական դիմակայության պայմաններում, որի ընթացքում կառավարության եւ ընդդիմության միջեւ հարաբերությունները հասել են առավելագույն լարվածության:
Սոցիալական ցանցերում տարածված հաղորդումների համաձայն՝ զինվորականներն իրենց հսկողության տակ են առել հեռուստակայանները:
Հեռուստատեսությամբ ցուցադրված ուղերձում հայտարարվել է, որ պարետային ժամ է սահմանվում, որպեսզի «վերականգնվի խաղաղությունն ու կարգը բոլոր կողմերը ներկայացնող մարդկանց համար»:
Թաիլանդը վերջին ժամանակներս ծանրագույն քաղաքական ճգնաժամ է ապրում: Ընդդիմությունը պահանջում է իշխանությունը հանձնել հատուկ նշանակված հանձնաժողովին, որը լիազորված կլինի մշակել երկրի նոր սահմանադրությունը:
Պարետային ժամի սահմանումը կարող է զայրացնել ներկայիս կառավարության կողմնակիցներին, մանավանդ եթե նրանք որոշեն, որ երկրում հեղաշրջում է տեղի ունենում:
Մայիսի 7-ին Թաիլանդի սահմանադրական դատարանը վճիռ էր կայացրել այն մասին, որ երկրի վարչապետ Յինգլակ Չինավաթը պետք է պաշտոնաթող լինի. նրան մեղավոր են ճանաչել իշխանության չարաշահման մեջ:
