Հայաստանի ՓՄՁ ԶԱԿ-ը Հունաստանի Կատերինի քաղաքում 2014թ.-ի հունիսի 25-26-ը մասնակցել է Black Sea LRED-Net ծրագրի համակարգողների 3-րդ հանդիպմանը: Հանդիպումն անցկացվել է «Սևծովյան ավազանի երկրների 2007-2013 թվականների համատեղ գործողությունների ծրագրի շրջանակում իրականացվող՝ «Տեղական/տարածաշրջանային տնտեսական զարգացման ցանցը որպես որոշիչ գործոն Սևծովյան տարածաշրջանում մրցակցության խթանման համար» (Black Sea L RED-Net) ծրագրի շրջանակում, որը համակարգում է Հայաստանի ՓՄՁ ԶԱԿ-ը:
Ինչպես «Արմենպրես»-ին տեղեկացրին Հայաստանի ՓՄՁ ԶԱԿ-ից, հանդիպման ընթացքում մասնակիցներն անդրադարձել են ծրագրի շրջանակներում կատարված ու կատարվելիք աշխատանքներին, ի հայտ եկած խնդիրներին և դրանց հնարավոր լուծումներին, ինչպես նաև քննարկվել են այլ ընթացակարգային հարցեր:
Ծրագրի իրականացման վերջին 4 ամիսների ընթացքում գործընկեր կազմակերպություններն իրականացրել են PACA վարժություններ, որոնք շարունակվելու են նաև առաջիկա ամիսներին: Յուրաքանչյուր վարժության տևողությունը կազմում է 3 շաբաթ, որի ընթացքում բացահայտվում են տեղական/ տարածաշրջանային մրցակցային առավելություններն ու տնտեսության ներունակ ճյուղերը և մատնանշվում այն նախաձեռնությունները, որոնք հնարավոր է կյանքի կոչել կարճ ժամկետում:
Ծրագրի շրջանակներում նախատեսվում է մշակել և հրատարակել PACA գրքույկներ, որոնցում կամփոփվեն PACA վարժությունների արդյունքներն ու տվյալ տարածքի տնտեսական առաջընթացին նպաստող նախաձեռնությունները:
Արդեն գործում է ծրագրի կայքը՝ http://www.lred-net.org/, որտեղ յուրաքանչյուր գործընկերոջ համար առանձնացված էջերում ներկայացված են նրանց իրականացրած աշխատանքները, կազմակերպված միջոցառումները, կոնտակտային տվյալները և այլն:
ԵՄ Եվրոպական հարևանության և գործընկերության ներքո Սևծովյան ավազանի երկրների համատեղ գործողությունների ծրագրի շրջանակում Հայաստանի փոքր և միջին ձեռնարկատիրության զարգացման ազգային կենտրոնը համակարգում է «Տեղական/տարածաշրջանային տնտեսական զարգացման ցանցը' որպես որոշիչ գործոն Սևծովյան տարածաշրջանում մրցակցության խթանման համար» (Black Sea LRED-Net) երկամյա միջազգային ծրագիրը:
Մասնակցում են Հունաստանի, Բուլղարիայի, Մոլդովայի և Վրաստանի գործարար ծառայություններ մատուցող կազմակերպությունները, ինչպես նաև ՀՀ Գեղարքունիքի մարզի առևտրաարաարդյունաբերական պալատը:
