ՀՀ սփյուռքի նախարար Հրանուշ Հակոբյանը հուլիսի 25-ին ՀՀ քաղաքացու անձնագիր է հանձնել Ուրուգվայում ՀՀ պատվավոր հյուպատոս, Ուրուգվայի հայ համայնքի ներկայացուցիչ Ռուբեն Ապրահամյան Էրգանյանին, ով ՀՀ Նախագահի հրամանագրով դարձել էր Հայաստանի Հանրապետության քաղաքացի:
Ինչպես «Արմենպրես»-ին տեղեկացրին ՀՀ սփյուռքի նախարարության մամուլի և հասարակայնության հետ կապերի վարչությունից, Ռուբեն Ապրահամյան Էրգանյանը ընթերցել է երդման տեքստը, և նախարարը նրան է հանձնել ՀՀ քաղաքացու անձնագիրը:
Նախարար Հրանուշ Հակոբյանը բարձր է գնահատել անվանի սփյուռքահայի գործունեությունը Ուրուգվայի հայ համայնքում, ով նաև ակտիվորեն ներգրավված է երկրի հասարակական կյանքում: Սփյուռքում բարեգործական և հասարակական գործունեություն ծավալելու, հայապահպանության գործում առանձնահատուկ ծառայությունների, Հայաստանի Հանրապետության և Սփյուռքի միջև գործուն կապերն ամրապնդելու համար Ռուբեն Ապրահամյան Էրգանյանն արժանացել է ՀՀ սփյուռքի նախարարության «Պողոս Նուբար» մեդալի:
Նախարար Հրանուշ Հակոբյանը մեծ գոհունակությամբ նշել է վերջին օրերին Հանրապետության Նախագահի պատվիրակության կազմում Ուրուգվայ այցելության, հայկական համայնքի կողմից ջերմ ընդունելության արժանանալու մասին:
Ռուբեն Ապրահամյան Էրգանյանը իր երախտագիտությունն է հայտնել նման բարձր գնահատականի արժանանալու համար և շեշտել, որ իր համար մեծ պատիվ է հայ լինել և Հայրենիքից դուրս զբաղվել հայապահպանությամբ: «Ով հայ է ծնվել, հայ պետք է մեռնի»,- նշել է նա:
Ռուբեն Ապրահամյան Էրգանյանը ծնվել է Ուրուգվայում: Տասնհինգ տարեկանից նա ներգրավվել է Ուրուգվայում հայկական կառույցների, մասնավորապես, Հայ ուսանողական միության աշխատանքներին, զբաղվել է ձեռներեցությամբ և բարեգործությամբ: 1988թ աղետալի երկրաշարժի ժամանակ դրամական աջակցություն է ցուցաբերել Հայրենիքին: 2009 թվականից մինչ այժմ զբաղեցնում է Ուրուգվայում ՀՀ պատվավոր հյուպատոսի պաշտոնը:
