ՀՀ Նախագահ Սերժ Սարգսյանի, ԵՊՀ ռեկտոր Արամ Սիմոնյանի, ներկա եւ նախկին համալսարանականների, մտավորականների, քաղաքական գործիչների մասնակցությամբ Երեւանի պետական համալսարանում մեկնարկեց ԵՊՀ առաջին ֆակուլտետների հիմնադրման 95-ամյակին նվիրված հանդիսավոր արարողությունը:
«Արմենպրես»-ի փոխանցմամբ' բացման խոսքում ԵՊՀ ռեկտոր Արամ Սիմոնյանը հույս հայտնեց, որ համալսարանական նորանոր սերունդները կգտնեն իրենց տեղը հասարակությունում: Ռեկտորի խոսքերով' հայապահպանության առաքելությունը լոկ անհատներին վերապահելը անպատասխանատու գործ է, եւ միայն կրթված սերունդը կարող է պահպանել ու արժեւորել հայրենասիրության, հայապահպանության գաղափարները:
«ԵՊՀ-ն նման սերնդի կայացման առաքելություն է ստացել եւ, հատկապես, Բանասիրության եւ Հայ պատմության ֆակուլտետները լուրջ ներդրում ունեն: Պատրաստվում են մանկավարժ կադրեր, ովքեր մուտք են գործում հանրակրթական ոլորտ եւ հանրային արժեքները, հայապահպանության գաղափարախոսությունը փոխանցում մատաղ սերնդին»,- ասաց Արամ Սիմոնյանը:
Միջոցառման ընթացքում ԵՊՀ Պատմության եւ Հայ բանասիրության ֆակուլտետների դեկանները ներկայացրեցին իրենց ֆակուլտետների անցած ճանապարհը, ձեռքբերումներն ու հաջողությունները: «Շնորհավորում եմ ԵՊՀ ֆակուլտետների հիմնադրման 95-ամյակի կապակցությամբ:
Երեւանի պետական համալսարանն անգնահատելի ավանդ ունի ցեղասպանության ենթարկված հայ ժողովրդի վերածննդի, Խորհրդային եւ անկախ Հայաստանի կայացման գործում, եւ այս դահլիճում նստածներից շատերն ու ձեր նախորդներն ունեն սեփական ներդրումն այդ ավանդին»,- նշեց ՀՀ Նախագահ Սերժ Սարգսյանը:
Հանդիսության ավարտին նա պետական պարգեւներ հանձնեց ԵՊՀ Պատմության եւ Հայ բանասիրության ֆակուլտետների պրոֆեսորա-դասախոսական կազմի մի խումբ ներկայացուցիչների:
