ՀՀ Անկախության 23-րդ տարեդարձի առթիվ Ճապոնիայում ՀՀ դեսպանությունը սեպտեմբերի 26-ին կազմակերպել է ընդունելություն: Տոկիոյի «Հոթել Օկուրա» հյուրանոցի սրահում հյուրընկալվել են ավելի քան 250 հյուրեր՝ Ճապոնիայի խորհրդարանի, կառավարության, պետական այլ կառույցների, գործակալությունների բարձրաստիճան պաշտոնյաներ, դիվանագիտական ներկայացուցչությունների ղեկավարներ, դիվանագետներ, Ճապոնիա- Հայաստան ընկերակցության, ճապոնահայկական բարեկամության միության անդամներ, գործարարներ, համալսարանների ղեկավարներ, արվեստագետներ, լրագրողներ:
Միջոցառման մեկնարկին հյուրերին ողջունել է Ճապոնիայում ՀՀ դեսպան Հրանտ Պողոսյանը: Նա մասնավորապես անդրադարձել է անկախության 23 տարիների ընթացքում Հայաստանի ձեռքբերումներին, մարտահրավերներին և երկրի զարգացմանն ու առաջընթացին ուղղված անելիքներին: Դեսպանը գոհունակություն է հայտնել հայ-ճապոնական տարեցտարի սերտացող հարաբերությունների առիթով՝ նշելով, որ Հայաստանն առավել ճանաչելի է դարձել ճապոնացի հասարակությանը, և հետաքրքրության ոլորտներն ու համագործակցության հեռանկարներն առավել ընդլայնվել են:
Այնուհետև Ճապոնիա -Հայաստան խորհրդարանական բարեկամական խմբի նոր ղեկավար Սեյշիրո Էտոն շնորհավորական ուղերձ է հղել Հայաստանի ղեկավարությանը և հայ ժողովրդին: Նա նշել է, որ Հայաստանն ու Ճապոնիան իրենց գործընկերությունն ու բարեկամությունը խորացնելու համար արդեն իսկ ակտիվ և հագեցած օրակարգ ունեն, և պատրաստակամ աշխատանքի շնորհիվ հնարավոր է իրականացնել օրակարգի բազմաթիվ հարցեր: Պատգամավորը վստահություն է հայտնել, որ հաջորդ տարեսկզբին Հայաստանում բացվող Ճապոնիայի դեսպանությունը ևս կնպաստի համատեղ աշխատանքի արդյունավետությանը:
