ՀՀ վարչապետ Հովիկ Աբրահամյանի գլխավորությամբ այսօր' հոկտեմբերի 30-ին, տեղի է ունեցել ՀՀ կառավարության հերթական նիստը: Մինչև oրակարգով նախատեսված հարցերի քննարկումը, վարչապետը ներկայացրել է Համաշխարհային բանկի և Միջազգային ֆինանսական կորպորացիայի գործարարության ավանդական վարկանիշը, ըստ որի Հայաստանը չորս կետով բարելավել է դիրքերը' 49-րդ կետից տեղափոխվելով 45-րդ կետ. «Միայն մեկ՝ հարկերի վճարման բաղադրիչով մենք 73-րդ տեղից առաջ ենք գնացել 41-րդ տեղ, և այստեղ իր դերակատարումն է ունեցել էլեկտրոնային վճարումների համակարգի գործարկումն ու տարածումը»,- ասել է վարչապետ Հովիկ Աբրահամյանը, նախարարների ուշադրությունը հրավիրելով վարկանիշային ցուցանիշների բարե լավման ուղղությամբ միջոցառումների ակտիվացման, արդյունքները հանրությանը ներկայացնելու անհրաժեշտության վրա: Վարչապետը արժևորել է հայրենական արտադրողի դերը, նրանց դրսևորվելու հնարավորությունների ստեղծման ու աջակցության կարևորությունը:

 

Անդրադառնալով «Ժամանակովոր անաշխատունակության մասին» և «Պետական նպաստների մասին» ՀՀ օրենքների փոփոխություններին, որոնցով նախատեսվում էր կրճատել աշխատող կանանց տրվող հղիության և ծննդաբերության նպաստները, իսկ չաշխատող հղի կանանց հատկացնել նվազագույն աշխատավարձի չափով նպաստ, վարչապետ Հովիկ Աբրահամյանն ասել է. «Բազմաթիվ քննարկումների արդյունքում պարզ դարձավ, որ հարցի շուրջ, իրոք, կա դժգոհություն: Կարծում եմ, որ մենք այս օրենքի նախագծում ամեն ինչ պետք է անենք, որ որևէ աշխատող հղի կին չտուժի: Դա ընդունեք հիմք, - ՀՀ աշխատանքի և սոցիալական հարցերի նախարարին դիմելով, վարչապետը շարունակել է. «Բազմաթիվ հարթակներում քննարկվում է այդ հարցը, դա հանրությանը շատ է հետաքրքրում: Հանրությունը պետք է իմանա, որ կառավարությունը չի գնալու որևէ քայլի, որի արդյունքում կտուժեն հղի կանայք: Նախագծի սկզբունքը սա պետք է լինի. որևէ աշխատող հղի կին չպետք է տուժի»:

 

Կառավարությունը հավանություն է տվել «Զինծառայողների և նրանց ընտանիքների անդամների սոցիալական ապահովության մասին» ՀՀ օրենքում փոփոխություններ կատարելու մասին» ՀՀ օրենքի նախագծին: Փոփոխությունները պայմանավորված են զինծառայողների ընտանիքների սոցիալական պաշտպանվածության մակարդակը բարձրացնելու անհրաժեշտությամբ: Մասնավորապես, ՀՀ պաշտպանության մարտական գործողություններին մասնակցելու կամ ծառայողական պարտականությունները կատարելու հետևանքով զոհված՝ (այդ թվում՝ ազատամարտիկների), ինչպես նաև ծառա յության ընթացքում մահացած զինծառայողների ընտանիքների շուրջ 3900 անդամ, ում կենսաթոշակի չափը ցածր է 31.000 դրամից (այդ թվում՝ զոհված ազատամարտիկների ընտանիքների շուրջ 2800 անդամ, ում կենսաթոշակի չափը կազմում է 21.000 դրամ), զինվորական կենսաթոշակի փոխարեն կստանա 31.000 դրամ, իսկ երեխան՝ 38.000 դրամ պարգևավճար:

 

Քննարկելով ԱԺ պատգամավոր Հրանտ Բագրատյանի ներկայացրած «Ակցիզային հարկի մասին» ՀՀ օրենքում լրացումներ և փոփոխություններ կատարելու մասին» ՀՀ օրենքի նախագիծը, կառավարությունը հեղինակին առաջարկել է առայժմ ձեռնպահ մնալ նախագծի քննարկումից և համագործակցել կառավարության հետ նոր օրենքի մշակման աշխատանքում, հաշվի առնելով այն հանգամանքը, որ Արժույթի միջազգային հիմնադրամի երկարաձգվող ֆինանսավորման ծրագրի շրջանակում ՀՀ կառավարության մտադրությունների նախագծում ամրագրված է նաև ոգելից խմիչքների համար 2015 թվականից ակցիզային հարկի դրույքաչափերի բարձրացման հարցը:

 

Կառավարությունը հավանություն է տվել «Օտարերկրացիների մասին» ՀՀ օրենքում փոփոխություններ և լրացումներ կատարելու մասին», «Պետական տուրքի մասին» ՀՀ օրենքում լրացում կատարելու մասին» ՀՀ օրենքների նախագծերի փաթեթին, որով հստակեցվում են գործատուների կողմից օտարերկրյա աշխատուժի օգտագործման հետ կապված հարաբերությունները:

 

Կառավարությունը դեմ է արտահայտվել ՀՀ ԱԺ պատգամավորներ Ռուբիկ Հակոբյանի և Թևան Պողոսյանի՝ օրենսդրական նախաձեռնության կարգով ներկայացրած նախագծերի փաթեթին, որով առաջարկվում է փոփոխություններ և լրացումներ կատարել Ինտերնետով հրապարակային և անհատական ծանուցման մասին, Զանգվածային լրատվության մասին, Հիմնադրամների մասին և մի շարք ՀՀ օրենքներում, իր դիրքորոշումը հիմնավորելով կառավարության եզրակացության մեջ:

 

Քննարկելով ԱԺ պատգամավոր Զարուհի Փոստանջյանի ներկայացրած օրենսդրական նախաձեռնությունը, որով առաջարկվում է փոփոխություններ և լրացումներ կատարել «Հանրային ծառայության մասին» ՀՀ օրենքում, նպատակ ունենալով հանրային ծառայության որոշակի պաշտոններում բացառել դատվածություն ունեցող քաղաքացիների նշանակումը' կառավարությունը դեմ է արտահայտվել ներկայացված նախագծի ընդունմանը, որովհետև իրավական այլ խնդիրներից բացի այդ դեպքում կիմաստազրկվի նաև դատվածությունը հանելու կամ մարելու նորմը:

 

Նույն պատգամավորի ներկայացրած մեկ այլ նախագծի վերաբերյալ, որով առաջարկվում է փոփոխություն և լրացումներ կատարել ՀՀ քաղաքացիական դատավարության օրենսգրքում, նպատակ ունենալով կարգավորել պետական տուրքը վերադարձնելու հետ կապված գործառույթները, կառավարությունն իր եզրակացության մեջ հիմնավորել է, որ գործող օրենսդրությամբ պետական տուրքը վերադարձնելու հետ կապված հարաբերություններն արդեն իսկ կարգավորված են, ուստի նպատակահարմար չի համարում ներկայացված օրենքի նախագծի ընդունումը:

 

Վերը նշված օրենքների նախագծերը և կառավարության եզրակացությունները սահմանված կարգով կներկայացվեն ՀՀ Ազգային ժողով:

 

ՀՀ կառավարությունը հաստատել է Եվրոպական տնտեսական միության անդամ մի պետությունից ԵՏՄ անդամ մյուս պետություն փոխադրվող անասնաբուժական հսկման ենթակա ապրանքների արտադրության, վերամշակող կազմակերպությունների և անձանց ռեեստրների օրինակելի ձևերը, դրանց ձևավորման և վարման ընթացակարգը, տվյալների փոխանցման կանոնակարգի պայմանները, ԵՏՄ անդամ երկրներից ներմուծվող և արտահանվող բուսասանիտարական կարանտին հսկողության ենթակա բույսերի, բուսական արտադրանքի կարանտին հսկողության ընթացակարգերը:

 

Գործադիրը կառավարության 2010թ. հոկտեմբերի 21-ի թիվ 1499 որոշման մեջ կատարել է անհրաժեշտ փոփոխություններ և լրացումներ, Հայաստանի Հանրապետությունից Մաքսային միության մաքսային տարածք ներմուծվող՝ ենթահսկման ենթակա ապրանքների միասնական անասնաբուժական սերտիֆիկատների ձևերը ներառելով ընդունվող որոշման մեջ: Վարչապետ Հովիկ Աբրահամյանը Եվրասիական տնտեսական միության հետ առնչվող բոլոր նախարարությունների ղեկավարների ուշադրությունը հրավիրել է հունվարի 1-ից սպասվող փոփոխությունների մասին գործարարներին իրազեկելու անհրաժեշտության վրա: &l aquo;Գործարարները տեղյակ չեն, թե ինչ փոփոխություններ են կատարվում: Անհրաժեշտ է հրավիրել մարդկանց, ներկայացնել փոփոխությունները, պատասխանել մարդկանց հարցերին: Տեղադրեք ձեր կայքերում բոլոր խնդիրները, հարցերը, դրանց պատասխանները»:

 

Գյուղատնտեսության ոլորտին վերաբերող մի շարք որոշումների քննարկումով գործադիրը հաստատել է տեխնոլոգիական օժանդակ միջոցների անվտանգությանը ներկայացվող միասնական սանիտարահամաճարակային և հիգիենիկ պահանջները, արտադրանքի (ապրանքների) սանիտարահամաճարակային և հիգիենիկ պահանջներին համապատասխանությունը հավաստող անվտանգության միասնական փաստաթղթի վարման կարգը, ՀՀ սանիտարահամաճարակային հսկողության (վերահսկողության) ենթակա ապրանքների և պետական գրանցման ենթակա ապրանքների ցանկերը, սանիտարական, անասնաբուժական, բուսասանիտարական միջոցառ ումների համարժեքության ճանաչման և ռիսկի գնահատման իրականացման կարգը, ՀՀ մաքսային սահմանին և ՀՀ տարածքում անասնաբուժական վերահսկողության իրականացման միասնական ընթացակարգը, անասնաբուժական վերահսկողության ենթակա օբյեկտների համատեղ ստուգումների, ապրանքների նմուշառման իրականացման միասնական կարգերը, պարենային հումքի արտադրության ժամանակ կենդանական ծագման սննդամթերքում անասնաբուժական դեղամիջոցների առավելագույն մնացորդային մակարդակները, կենսաբանական ակտիվ հավելումների ցանկը, թույլատրելի մակարդակները, դրանց արտադրության մեջ օգտագործվող վիտամինների ձևերը և արգելված բույսերի ցանկը, սանիտարահամաճարակային հսկողության (վերահսկողության) ենթակա ապրանքներին ներկայացվող պահանջները, սննդամթերքի և սննդային միջավայրի հետ շփման համար նախատեսված պոլիմերային և այլ նյութերից պատրաստված ապրանքի և նյութերին ներկայացվող պահանջները, սննդամթերքում Ցեզիում-137 և Ստրոնցիում-90 ռադիոնուկլիդների թույլատրելի մակարդակները, սննդային հավելումների և բուրավետիչների անվտանգությանը ներկայացվող պահանջները:

 

Մեկ այլ որոշմամբ փոփոխություններ և լրացում է կատարվել «Հնդկաստանի Հանրապետությունից Հայաստանի Հանրապետություն գոմեշի միս ներմուծելու մասին» որոշման մեջ, որով ստեղծվում են գոմեշի մսի ներմուծման գործունեությամբ զբաղվող իրավաբանական անձանց՝ համապատասխան չափանիշներին համապատասխանելիության ստուգման պատշաճ մեխանիզմներ:

 

Երկու այլ որոշումներով կառավարությունը հաստատել է հանքային ջրերին ներկայացվող պահանջները, շշալցված խմելու ջրին ներկայացվող պահանջները, շշալցված խմելու ջրերի որակի և անվտանգության չափորոշիչները:

 

Հիմք ընդունելով ՀՀ կառավարության և Չինաստանի Ժողովրդական Հանրապետության կառավարության «Տեխնիկատնտեսական համագործակցության մասին» համաձայնագրերը, գործադիրը որոշում է ընդունել Երևանում չինարենի խորացված ուսուցմամբ դպրոց կառուցելու մասին, չինական կողմին տրամադրելով համապատասխան տարածք: Դպրոցի շինարարության վերաբերյալ պայմանավորվածությունը ձեռք է բերվել ՀՀ և ՉԺՀ նախագահների միջև 2010թ. կայացած հանդիպման ժամանակ:

 

Կառավարությունը հաստատել է Եվրոպայի խորհրդի «Ազգային փոքրամասնությունների պաշտպանության մասին» շրջանակային կոնվենցիայի՝ Հայաստանի Հանրապետության կողմից կատարման վերաբերյալ ՀՀ չորրորդ համատեղ պարբերական ազգային զեկույցը:

 

Կառավարությունը որոշել է ընդունել ԱՄՆ «Թանք ֆորս ֆոր գլոբալ հելթ» շահույթ չհետապնդող կազմակերպության կողմից սեզոնային գրիպի 60.000 պատվաստանյութի նվիրաբերությունը Հայաստանի Հանրապետությանը, հաստատել պատվաստանյութի տրամադրման վերաբերյալ Փոխըմբռնման Հուշագիրը:

 

Սոցիալական պաշտպանության համակարգի տարածքային մարմինների աշխատողների այցելությունների գործընթացը բնականոն ապահովելու, կատարված ծախսերը համարժեք փոխհատուցելու նպատակով կառավարությունը հաստատել է սոցիալական ծառայություններ տրամադրող տարածքային մարմինների կողմից իրականացվող այցելությունների վճարման կարգը:

 

Գործադիրը ուժը կորցրած է ճանաչել 2000թ. հուլիսի 20-ի՝ Բռնադատվածների կամ նրանց առաջին հերթի ժառանգների կողմից բնակարանային անհատական շինարարության կամ անավարտ տան շինարարության, բնակարան ձեռք բերելու կամ վերանորոգելու համար ՀՀ պետբյուջեից արտոնյալ պայմաններով երկարաժամկետ վարկ տրամադրելու մասին որոշումը, սահմանել մինչև սույն որոշման ընդունումը ժամկետանց պարտավորությունների դիմաց հաշվարկված տույժերը զիջելու, վարկի հիմնական գումարի մարման գործընթացը:

 

Մեկ այլ որոշումով սահմանվել է արտակարգ իրավիճակներում ազգային գրադարանային հավաքածուի տարհանման և պաշտպանության կարգը, սահմանվել են այդ ժառանգությունը պահպանելու և սերունդներին ապահով փոխանցելու բոլոր հնարավոր պայմաններն ու նախադրյալները:

 

Կառավարությունը նոր խմբագրմամբ է հաստատել ստոմատոլոգիական կենտրոնների, պոլիկլինիկաների և կաբինետների կառուցվածքի, շահագործման, գործունեության համար անհրաժեշտ տեխնիկական և մասնագիտական որակավորման պահանջներն ու պայմանները:

 

Արմավիրի մարզի Արազափ համայնքին հատկացված տրակտորի արժեքի 50 տոկոսը մարելու նպատակով կառավարությունն իր պահուստային ֆոնդի հաշվից հատկացրել է 3.5 մլն դրամ: Գյուղական համայնքին տրամադրվող աջակցության շնորհիվ հնարավոր կլինի ցանքաշրջանառության մեջ ընդգրկել գյուղի չօգտագործվող վարելահողերը, որակյալ իրականացնել մշակաբույսերի վեգետացիայի ընթացքում կիրառվող ագրոտեխնիկական աշխատանքները:

 

Չարենցավանի քաղաքային համայնքում ձևավորված սոցիալական բնակարանային ֆոնդի հարկային պարտավորությունների կատարման նպատակով կառավարությունը տրամադրել է 12 մլն 259 հազար դրամ:

 

Կառավարությունը հավանություն է տվել Դիլիջանի քաղաքային համայնքի տարածքում գտնվող անշարժ գույքի մասնավորեցումից ստացված միջոցների տնօրինման ծրագրին, որով նախատեսվում է համայնքային բյուջե մուտքագրված գումարը ուղղել քաղաքի երկրագիտական թանգարանի սրահների ցուցադրության կազմակերպմանն ու կահավորմանը:

 

Կառավարությունը փոփոխություններ և լրացումներ է կատարել «Ապրանքի ծագման երկրի հավաստագրի տրամադրման և փորձաքննության անցկացման կարգը հաստատելու մասին» իր նախկինում ընդունած որոշման մեջ, պարզեցնելով ծագման երկրի սերտիֆիկատի և փորձաքննության ակտի ստացման գործընթացը:

 

Ներդրումային ծրագրի շրջանակում «Ինտերալկո» ՍՊԸ կողմից 200 մլն դրամը գերազանցող ապրանքների ներմուծման դեպքում ԱԱՀ գումարի վճարման ժամկետը մինչև երեք տարով հետաձգելու մասին որոշմամբ նախատեսված ծրագրի ընթացքը ապահովելու նպատակով կառավարությունը փոփոխություններ և լրացումներ է կատարել իր նախկին որոշման մեջ, ճշգրտելով ներմուծվող ապրանքների անվանացանկը:

 

Քաղաքաշինական գործունեության նպատակով պետական կամ համայնքային սեփականություն հանդիսացող տարածքների զբաղեցման, մասնավորապես՝ կառուցապատող-իրավասու մարմին հարաբերությունների կարգավորման նպատակով լրացումներ են կատարվել նախկինում ընդունված որոշման մեջ, մեկ այլ որոշման մեջ կատարված փոփոխություններով կարգավորվել են քարաթափերի վտանգավոր գոտիներում գտնվող քաղաքաշինական օբյեկտների՝ հասարակական ու արտադրական շենք-շինությունների պաշտպանությանն առնչվող հարցեր:

 

«Հյուսիս-հարավ ճանապարհային միջանցքի ներդրումային ծրագրի իրականացման կազմակերպություն» ՊՈԱԿ-ի կանոնադրության երկու տարբեր դրույթների հակասությունը վերացնելու նպատակով գործադիրը համապատասխան փոփոխություն է կատարել ՊՈԱԿ-ի կանոնադրության մեջ, ճանապարհային ոլորտը համակարգող խորհուրդը հաստատել նոր կազմով:

 

Կառավարությունը թույլատրել է պետական գույքի կառավարման վարչությանը կառավարական թիվ 2 մասնաշենքի հասցեում գտնվող շենքի բաղադրիչը համարվող գույքի ենթամասերն ու հատվածները ձեռք բերելու գործընթացում աջակցություն և օժանդակություն ցույց տալ գնորդին և գործարքների իրականացման համար արտաբյուջետային հաշիվ բացել:

 

Կառավարությունն ընդունել է Արմավիրի մարզի Բաղրամյանի գյուղական համայնքի ավագանու անդամների արտահերթ ընտրություն նշանակելու, անցկացնելու, ընտրության նախապատրաստման ու անցկացման ծախսը ֆինանսավորելու որոշում:

 

Մեկ այլ որոշումով Մհեր Անանյանը նշանակվել է ՀՀ սպորտի և երիտասարդության հարցերի նախարարության աշխատակազմի ղեկավար: