Ռեժիսոր Արշակ Զաքարյանը նոր տեսանյութ է հրապարակել YouTube-ի իր ալիքում, որում պատմվում է, թե ինչպես է հայ զինվորը միայնակ մարտի բռնվելով մի խումբ ադրբեջանցի դիվերսանտների հետ, վնասազերծել նրանցից մեկին, միևնույն ժամանակ իր մարմնով պաշտպանելով իր ծառայակից ազգությամբ եզդի ընկերոջը' նրան դուրս քաշելով թշնամու կրակի տակից, ստիպել է ողջ դիվերսիոն խմբին հետ փախչել:
Հատկանշական է, որ զինվորը աջ ձեռքի գրպանիկում ունեցել է Նոր կտակարան, ինչին էլ դիպչել է հակառակորդի կողմից պայթեցված նռնակի բեկորը:
Հիշեցնենք՝ ապրիլի 20-ի լույս 21-ի գիշերը ժամը 05:15-ի սահմաններում ղարաբաղա-ադրբեջանական հակամարտ զորքերի շփման գծի հյուսիսարևելյան (Սեյսուլան) ուղղությամբ հակառակորդը ձեռնարկել էր դիվերսիոն-հետախուզական ներթափանցման հերթական փորձը:
ՊԲ առաջապահ ուժերը ժամանակին հայտնաբերելով ադրբեջանական դիվերսիոն խմբի առաջացումը, անցել են շրջանաձև պաշտպանության և մերձամարտի բռնվել նրա հետ: Շուրջ քառորդ ժամ տևած մարտերի արդյունքում հակառակորդը դեպքի վայրում է թողել արյան բազմաթիվ հետքեր, 5 հատ նռնակի մասեր, ՎՈԳ-25-ի մեկ արկ, 5 դատարկ պահունակ, հատուկ դիպուկահար հրացանի («Վինտարեզի») 1 պահունակ' 4 փամփուշտով, կապի համար նախատեսված 1 կոճ, բժշկական ասեղներ, տարբեր տրամաչափի բազմաթիվ պարկուճներ և ճողոպրել իր ելման դիրքերը:
Ըստ հավաստի տեղեկությունների, ադրբեջանական կողմը մարտի ընթացքում տվել է առնվազն 1 զոհ և վիրավորներ:
ՊԲ դիրքապահ ուժերը կորուստներ չեն ունեցել:
