Հուլիսյան իրադարձությունների ժամանակ ՊՊԾ գունդ «Սասնա ծռերի» անդամներին հաց հասցրած Արթուր Սարգսյանը՝ «Հաց բերողը», հայտարարություն է արել:
Նրա փաստաբան Տիգրան Եգորյանը փոխանցել է Սարգսյանի հայտարարությունն այն մասին, որ վերջինս անժամկետ հացադուլ է հայտարարում և իր առողջության հետագա վատթարացման ողջ պատասխանատվությունն ընկնում է ՀՔԾ քննիչ Հակոբյանի և դատավոր Մկրտչյանի վրա: «Իմ առողջության հետագա վատթարացման համար մեղավոր ճանաչել քննիչ Էդ. Հակոբյանին և դատավոր Մկրտչյանին, քանի որ նրանք իրենց գործողություններով դրդեցին ինձ այս քայլին»,- նամակում գրել է Արթուր Սարգսյանը:
«Հաց բերողը» հայտարարում է, որ իր կալանավորումն ապօրինի է: Նա նաև ներկայացրել է բոլոր այն հիվանդությունները, որոնցով տառապում է:
Նշենք, որ «Հաց բերողին» կրկին երկու ամսով կալանավորել են: Նա գտնվում է «Դատապարտյալների հիվանդանոց» քրեակատարողական հիմնարկում:
Լուսանկարը՝ Հետք-ի
