Երկու անձի մահվան պատճառ դարձած ավտովթարի դեպքի առթիվ ՀՀ ՔԿ Սյունիքի մարզային քննչական վարչության Գորիսի քննչական բաժնում քննվող քրեական գործով վարորդը ձերբակալվել է։

Ավելի վաղ տեղեկացրել ենք, որ 2017թ. մայիսի 4-ին' առավոտյան, ավտովթար է տեղի ունեցել Որոտան գյուղի մոտ, որի հետեւանքով մահացել են քույր ու եղբայր՝ Դավիթ (ծնված՝ 22.10.1996թ ) եւ Աստղիկ (ծնված 04.05.1998թ) Մկրտչյանները։

Նախնական տվյալներով՝ Սյունիքի մարզի Քաջարան քաղաքի բնակիչ Ա.Միրզոյանը՝ «Տոյոտա պրադո 4.5L » մակնիշի ավտոմեքենայով, որի մեջ գտնվել են Դավիթ եւ Աստղիկ Մկրտչյանները, Սյունիքի մարզի Որոտան գյուղից երթեւեկել է Գորիս քաղաքի ուղղությամբ։

Նույն գյուղի վերջնամասում գտնվող կամրջին չհասած՝ ավտոմեքենան դուրս է եկել երթեւեկելի գոտուց եւ 40.8 մետր ընթանալով ճանապարհի ձախակողմյան կանաչապատ ձորակով՝ ընկել է Որոտան գետը, գլխիվայր շրջվել գետի միջով անցնող խողովակների վրա։ Ստացած մարմնական վնասվածքներից ուղեւորները՝ Դավիթ եւ Աստղիկ Մկրտչյանները, տեղում մահացել են, իսկ վարորդը վնասվածքներով տեղափոխվել է Գորիսի բժշկական կենտրոն:

Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 3-րդ մասի հատկանիշներով: Վարորդը ձերբակալվել է։

Նախաքննությունը շարունակվում է։