![](http://mediamall.am/timthumb.php?src=upload/183792.png&w=300&h=200&mt=1517150160)
Հանրապետության Նախագահ, զինված ուժերի գերագույն գլխավոր հրամանատար Սերժ Սարգսյանը՝ Բանակի օրվա առթիվ, hայրենիքի սահմանները պաշտպանելիս ցուցաբերած նվիրումի և խիզախության, ինչպես նաև մատուցած նշանակալի ծառայությունների համար մի խումբ զինծառայողների և ազատամարտիկների պարգևատրել է Հայաստանի Հանրապետության բարձր պարգևներով, շքանշաններով ու մեդալներով, շնորհել նաև բարձրագույն զինվորական կոչումներ:
Հանրապետության Նախագահը շնորհավորել է զինծառայողներին և ազատամարտիկներին տոնի ու պետական բարձր պարգևների արժանանալու կապակցությամբ:
Նախագահ Սերժ Սարգսյանի շնորհավորական խոսքը Բանակի օրվա առթիվ պարգևատրման արարողության ժամանակ
Պարոնա՛յք գեներալներ,
Տիկնա՛յք և պարոնա՛յք սպաներ,
Սիրելի՛ ազատամարտիկներ,
Շնորհավորում եմ ձեզ Բանակի օրվա կապակցությամբ: Այսօր դուք արժանացել եք հայրենիքի բարձր պարգևներին և կոչումներին: Դա մեր ժողովրդի և պետության կողմից ձեզ երախտագիտություն հայտնելու մի դրվագ է:
Համոզված եղեք, որ ձեր ծառայությունը և ներդրումը հայրենիքի պաշտպանության գործում շատ բարձր է գնահատվում: Ամեն անգամ այսպիսի պաշտոնական արարողությունները գալիս են ապացուցելու, որ իրոք, ոչ ոք և ոչինչ չի՛ մոռացվել, ձեր արած ոչ մի գործ աննկատ չի՛ մնացել: Վստահ եմ, որ մեր ժողովրդի ջերմ վերաբերմունքը մշտապես խրախուսում է ձեզ՝ պատվով և արժանապատվությամբ շարունակելու ձեր ազնիվ ծառայությունը Հայաստանին և Արցախին:
Ձեր անցած ճանապարհն ու անբասիր ծառայությունը մեկ նպատակ է հետապնդում՝ պահպանել Հայաստան աշխարհի անվտանգությունը և անդորրը: Ձեր և ձեր զինակիցների շնորհիվ ապրում ու արարում է Հայաստանը: Այսօր քայլ առ քայլ, հետևողականորեն իրականացվում են մեր ժողովրդի նվիրական երազանքները: Այս համոզմամբ և գիտակցությամբ Հայաստանը շարունակելու է հազարամյակների իր երթը դեպի լուսավոր ապագա:
Շնորհավորում եմ նրանց, ովքեր այս դահլիճում են և, իհարկե, նաև նրանց, ովքեր այլ արարողակարգով են ստացել իրենց պարգևները: Դուք և ձեր զինակիցները Հայաստանի ժողովրդի հույսն ու ապավենն եք: Մենք հպարտանում ենք ձեզնով և հենվում ձեր հաղթական կամքի վրա:
Շնորհակալ եմ:
![](http://lurer.com/disc/28-01-18/bcee77eca18c3464c57bf46809e405ab.jpg)
![](http://lurer.com/disc/28-01-18/6d2f68f84ee9fd39a1c7a97833552a46.jpg)
![](http://lurer.com/disc/28-01-18/80bfacf1451bcfc28a6df642628c5563.jpg)
![](http://lurer.com/disc/28-01-18/218757dbcca28d24027fb6f8b26db5e0.jpg)
![](http://lurer.com/disc/28-01-18/627c374bb8d2fdc88a3295f154927e5e.jpg)
![](http://lurer.com/disc/28-01-18/072f146fac116426f05580c46eee1b7e.jpg)
![](http://lurer.com/disc/28-01-18/88e1e8b59a2604848fe20ecc6ff61ed6.jpg)
![](http://lurer.com/disc/28-01-18/1f9f26cffaeba002ce1cb234e6ac1138.jpg)
![](http://lurer.com/disc/28-01-18/f6a61ac7e1bc7cc703bc3b7d981952d6.jpg)
![](http://lurer.com/disc/28-01-18/6407f7bf054f04181a4a94823fc6e2ad.jpg)