Լիբանանը կանգնած է Հայաստանի կողքին' իր ժողովրդի ինքնիշխանության, խաղաղության և բարգավաճման բնական իրավունքները պաշտպանելու գործում: «Արմենպրես»-ի փոխանցմամբ' ՀՀ նախագահական նստավայրում հայ-լիբանանյան բարձր մակարդակի բանակցությունների ավարտին հայտարարեց պաշտոնական այցով Հայաստանում գտնվող Լիբանանի Հանրապետության նախագահ Միշել Աունը: Նա իր երախտագիտությունը հայտնեց նախագահ Սերժ Սարգսյանին միջազգային ատյաններում Լիբանանի կողքին գտնվելու համար:
Նախագահ Աունը գոհունակությամբ փաստեց, որ ՀՀ Նախագահ Սերժ Սարգսյանի հետ հանդիպումն անցավ ջերմ ու բարեկամական մթնոլորտում: Բարձրաստիճան հյուրը երկու ժողովուրդների ու պետությունների ամուր ու հաստատուն կապերի գործում կարևորեց լիբանանահայ համայնքի դերակատարությունը: «Այսօր այդ ներկայացուցիչներից շատերն ուղեկցում են ինձ, նրանք մեծ գնահատանքի են արժանացել լիբանանյան հասարակության կողմից' երկրի սոցիալական, տնտեսական, մշակութային և մի շարք այլ ասպարեզներում իրենց դերակատարման համար»,-ընդգծեց Միշել Աունը:
Միշել Աունը պաշտոնական այցով Հայաստան է ժամանել ՀՀ Նախագահ Սերժ Սարգսյանի հրավերով փետրվարի 21-ին:
