«Ծառուկյան դաշինք» խմբակցության պատգամավոր Իվետա Տոնոյանը հայտարարել է այն մասին, որ Գագիկ Ծառուկյանն արդեն իսկ վերադարձել է Հայաստան և այսօր երեկոյան հանդիպում է նշանակել ԲՀԿ քաղաքական թիմի անդամների հետ՝ տեղեկանալու վերջին քվեարկության և դրան հաջորդած իրադարձությունների մասին:
Կա վարկած, որ Ծառուկյանը տեղեկացված չի եղել խնդրահարույց օրենքի բոլոր մանրամասներին: Եղել են «թաքնված» կետեր, որոնք նախապես չեն ներկայացվել կուսակցության առաջնորդին: Այդ աժիոտաժի մեջ բավականին ակտիվ ներգործություն է ունեցել Իշխան Զաքարյանը։
Հիշեցնենք՝ խոսքը հոկտեմբերի 2-ին, երկրորդ և վերջնական ընթերցմամբ ԱԺ-ն 67 կողմ քվեներով ընդունեց «ԱԺ կանոնակարգ» օրենքում փոփոխությունների նախագիծը, որը, ըստ վարչապետ Նիկոլ Փաշինյանի և «Ելքի» պատգամավորների, վարչապետի հրաժարականից հետո թույլ կտա խափանել արտահերթ ընտրությունների անցկացումը:
Նշենք, որ օրինագծին կողմ էին քվեարկել ՀՀԿ, ՀՅԴ և «Ծառուկյան» խմբակցության պատգամավորները։
