eMedia.am. Լուիզիանայի նահանգի սենատը ընդունել է բանաձև, համաձայն որի ճանաչում է Արցախի Հանրապետությունը որպես անկախ պետություն ու ողջունում է վերջինիս ջանքերը զարգանալու որպես ազատ ու անկախ պետություն ու կոչ անում ԱՄՆ Սենատին ճանաչելու Արցախի անկախությունը: Մայիսի 30-ին ԱՄՆ Լուիզիանայի ընդունած բանաձևում, մասնավորապես, ասվում է, որ այն ընդունվում է աջակցելու Լեռնային Ղարաբաղի Հանրապետության ջանքերին զարգանալու որպես ազատ ու անկախ պետություն: Լեռնային Ղարաբաղը, որը նաև հայտնի է որպես Արցախ, պատմականորեն եղել է հայկական տարածք, որը անօրինաբար անջատվել է Հայաստանից Սովետական Միության կողմից 1921 թ-ին ու միացվել է նորաստեղծ Ադրբեջանին: 1988 թ-ի փետրվարի 20-ը նշանավորվել է որպես Լեռնային Ղարաբաղի ժողովրդի ազգային ազատագրական պայքարի սկիզբ, որը խթան հանդիսացավ ողջ Սովետական Միության բնակչության համար ոտքի կանգնել՝ պաշտպանելու իրենց իրավունքները ու բերելու ժողովրդավարությունը միլիոնավոր մարդկանց՝ տարածելով խաղաղությունը աշխարհով մեկ: ԱՄՆ Սենատը բազմիցս արտահայտել է իր աջակցությունը Լեռնային Ղարաբաղի ազատ կամքին: 1991 թ-ին համաձայն գործող օրենսդրության, Լեռնային Ղարաբաղի հանրապետությունը հռչակեց իր անկախությունը, իսկ դեկտեմբերի 10-ին հանրապետության ժողովուրդը քվեարկեց անկախության համար, այնուհետև 1992 թ-ի հունվարի 6-ին քվեարկելով օրենսդրության օգտին՝ փաստացի դառնալով անկախ: Այդ օրվանից ԼՂՀ-ն գրանցել է նշանակալի առաջընթաց ժողովրդավարության ստեղծման ճանապարհին, իսկ ընտրությունները, որոնք հսկել են միջազգային դիտորդներ, ճանաչվել են ազատ ու թաանցիկ: Հետայսու Լուիզիանայի Սենատը կոչ է անում ԱՄՆ սենատին աջակցելու Լեռնային Ղարաբաղի Հանրապետության անկախության կառուցմանը ու նրա ներգրավմանը համաշխարհային հանրության մեջ: Փաստաթղթի կրկնօրինակները փոխանցվում են նաև Սպիտակ Տուն, ԱՄՆ Սենատ ու ԱՄն Ներկայացուցիչների Պալատ: Բանաձևը ներկայացրել է ԱՄն դեմոկրատական կուսակցության անդամ Էդվին Մյուրեյը: