ՀՀ-ում թվով 100 ցմահ դատապարտյալ կա, նրանցից 97-ը իրենց պատիժը կրում են «Նուբարաշեն» քրեակատարողական հիմնարկում, իսկ 3-ը՝ «Երևան կենտրոն» ՔԿՀ-ում: «Նուբարաշեն» ՔԿՀ-ում իրենց պատիժը կրող 97 ցմահ դատապարտյալներից 63-ը դատապարտվել են 2003թ. ՀՀ քրեական օրենսգրքի ընդունումից հետո, և միայն 1 ցմահ դատապարտյալ է անազատության մեջ գտնվում 20 տարուց ավելի: Անազատության մեջ լինելու ընթացքում 89 ցմահ դատապարտյալ ենթարկվել է կարգապահական տույժի: Կրկնահանցագործությունների թիվն էլ 19-ն է: ՀՀ ԱՆ քրեակատարողական վարչության հանրային կապերի բաժնի պետի ժամանակավոր պաշտոնակատար Գոռ Ղլեչյանի փոխանցմամբ՝ ցմահ դատապարտյալների կողմից փախուստի փորձերը եղել են 5-ը, «սակայն այս թիվը ոչ թե նշանակում է 5 տարբեր մարդիկ են փախուստի փորձ կատարել, այլ այն, որ նույն անձը հնարավոր է մեկից ավելի անգամ փախուստի փորձ կատարած լինի«,- ասաց Գոռ Ղլեչյանը: