Aravot.am  -Ի՞նչ հույսեր եք կապում այս ընտրության հետ, ի՞նչ արդյունք եք ակնկալում ընտրապայքարից: Ի վերջո փորձը ցույց է տվել, որ ընտրություններում հիմնականում ՀՀԿ-ական թեկնածուներն են հաղթանակած դուրս գալիս:

-Հանրապետական թեկնածուն այստեղ՝ Կապանում, խայտառակ պարտություն կրած է գնացել փետրվարի 18-ին, ՀՀԿ-ի թեկնածուին սյունեցիները ճանապարհել են եւ ասել են իր տեղը: Ես կարծում եմ, որ դա ոչ թե մեկ օրվա համար էր ասված, այլ սյունեցու պատասխանն ուներ երկարատեւ ծրագիր եւ դրան սյունեցին արժան է լինելու: Այդ երկարատեւ ծրագիրը, իրոք, հայրենիքի ազատագրումն է բոլոր այն արատավոր երեւույթներից, որոնք մեզ այս 20 տարիների ընթացքում անընդհատ փորձել են սերմանել:

- Իսկ ռեա՞լ եք գնահատում ձեր առաջադրած թեկնածուի շանսերը:

-Մեր թեկնածուն անբասիր կենսագրությամբ, Կապան քաղաքի լավագույն արժանավոր ներկայացուցիչներից է, ով ժամանակի կանչով դեռ 20 տարի առաջ երբեք չի էլ վարանել, որ կարող է չմասնակցել իր հայրենիքի պաշտպանությանն ու ազատագրմանը: Այսօր այս մարտին ինքը զիվորագրվել է՝ որպես ազնիվ, հզոր ու համեստ զինվորական եւ պայքար է տանելու: Իսկ իր կողքին կանգնած է «Ժառանգություն» կուսակցությունը՝ իր առաջնորդ, ընտրված նախագահ Րաֆֆի Հովհաննիսյանով:

-Իսկ ի՞նչ կասեք մյուս թեկնածու, ՀՀԿ-ական Արմեն Կարապետյանի մասին, որքանո՞վ եք տեղյակ նրա կենսագրությանն ու գործունեությանը:

-Իհարկե տեղյակ ենք, անտեղյակ չենք, մենք Հայաստանի Հանրապետության տեղյակ քաղաքացիներից ենք: Գիտենք նրա մասին եւ այդ ամենն իմանալով ասում ենք, որ տվյալ թեկնածուն մնալու է անցյալում՝ ինչպես Սերժ Սարգսյանը փետրվարի 18-ին:

-Սովորաբար ասվում է, որ ընտրություններն անցկացվում են կեղծիքների միջոցով եւ այլն: Ձեր կարծիքով արդար ընտրություններ կանցկացվե՞ն այստեղ եւ եթե ոչ, ապա ի՞նչ քայլեր կձեռնարկեք այդ ուղղությամբ:

-Մենք մարտահրավեր ենք նետել բոլոր նրանց, ովքեր շարունակելու են այն արատավոր երեւույթները, որ տեղի են ունեցել մեր կյանքում: Մենք մարտահրավեր նետել ենք՝ ե՛ւ մասնակցությամբ, ե՛ւ հաղթանակի ամրագրմանը տանող պայքարով: Եթե փորձերը, ցանկություններն ու իրենց ախորժակը նրանք նորից բանեցնեն՝ համապատասխան պատասխան են ստանալու:

-Կհստակեցնե՞ք կոնկրետ ինչ քայլեր եք ձեռնարկելու:

-Բոլոր հանձնաժողովներում «Ժառանգությունն» ունի իր հանձնաժողովի անդամը, ամբողջ հանրապետության լավագույն հանձնաժողովականները, որոնք մեկ անգամ չեն իրենց դրսեւորել՝ որպես ազնիվ, պայքար տանող ու անկաշառ մարդիկ, նրանք լինելու են ընտրատեղամասերում: Բացի այդ, ողջ «Ժառանգության» կազմը, Սյունիքի մարզում է լինելու եւ ամեն կերպ հետեւելու է, որպեսզի ապօրինություններ տեղի չունենան: Ես կարծում եմ, որ մեր հասարակությունն ապօրինություններին արդեն սովորել է եւ իմունիտետ է ձեռքբերել պատասխան տալու: Եթե հանրապետական կուսակցության անդամը, փորձի բաժանել ընտրակաշառք, ապա այդ ընտրակաշառքը նախ լիելու է ապօրինություն, հանցագործություն եւ երկրորդը՝ այդ գումարները չեն ծառայելու իրենց նպատակին, այսինք՝ քաղաքացիներն արդեն իսկ գիտակցում են, որ այդ գումարը կարող են ստանալ, բաց դա չծառայեցնել գումար տվողի ցանկությանը: Նույնիսկ, եթե այդպիսի փորձ կատարվի Հանրապետական կուսակցության ներկայացուցիչների կողմից, ապա դա լինելու է ապարդյուն:

-Կապանում ինչ-որ չափով ծանոթ են Ձեր թեկնածու Սամվել Հայրապետյանին, ի՞նչ սպասելիքներ ունեք Մեղրու տարածաշրջանից: Այնտեղ ՀՀԿ-ի թեկնածուները տարբեր ընտրություններում ձայների գերակշիռ մասն են հավաքում հիմնականում:

-Ոչ՝ այդպես չէ, Ագարակում միգուցե, Մեղրիում այս անգամ էր Հանրապետական կուսակցության թեկնածուն շատ ձայներ հավաքել: Անկախ նրանից, թե ինչպես պետք է իրեն պահի Հանրապետական կուսակցությունը, մենք պայքարը տանելու ենք բոլոր ուղղությունենրով: Որեւէ բնակիչ անմասն չի մնալու մեր թեկնածուի վերաբերյալ քարոզչական նյութերից տեղեկատվություն ստանալուց, եւ անմասն չի մնալու հանրապետական կուսակցության թեկնածուի մասին տեղեկատվություն ունենալուց, քանի որ նրանց փորձը բնակիչների համար արդեն պարզ է. դա եղել է շարունակաբար արտագաղթը, դա եղել է մարզում հարուցված բնապահպանական հսկայածավալ խնդիրները, դա եղել է այսօրվա մեր աղքատությունը: Իսկ «Ժառանգությունը», բոլորի համար հայտնի է, ինչ գաղափարով է պատրաստվում իրականացնել իր քաղաքականությունը:

Հ.Գ. Քիչ առաջ «Ժառանգություն» կուսակցության առաջադրած փեկնածու Սամվել Հայրապետյանի մամլո խոսնակ Դավիթ Հակոբյանը տեղեկացրեց, որ թեկնածուն այս պահին նախընտրական հանդիպումներ է ունենում Կապանի գյուղերում, ում այս պահին միացել է նաեւ մայրաքաղաքից ժամանած «Ժառանգություն» կուսակցության փոխնախագահ Արմեն Մարտիրոսյանը: Դավիթ Հակոբյանի խոսքով՝ գյուղերում թեկնածուին եւ իր թիմին շատ ջերմ են ընդունում:

Հեղինակ` Մերի ՍՈՂՈՄՈՆՅԱՆ