Լոռու մարզի Պուշկինո ավանի զորամասում Ազգային անվտանգության ծառայության սահմանապահ զորքերի առաջին սահմանապահ ջոկատին հանձնվեց մարտական դրոշ: Դրոշը զորամասին հանձնելուց առաջ Հայաստանյայց Առաքելական Եկեղեցու Գուգարաց թեմի առաջնորդ Սեպուհ արքեպիսկոպոս Թուլջյանն իր աղոթքով օրհնեց այն:
Այնուհետև ՀՀ ԱԱԾ տնօրենի առաջին տեղակալ գեներալ-լեյտենանտ Արզուման Հարությունյանն ընթերցեց զորամասին մարտական դրոշ հանձնելու մասին ՀՀ նախագահ Սերժ Սարգսյանի վկայագիրը.
«Մարտական դրոշը հանձնվում է ՀՀ կառավարությանն առընթեր ԱԱԾ սահմանապահ զորքերի առաջին սահմանապահ ջոկատին, որպես զինվորական պատվի, փառքի և արիության խորհրդանիշ, որպես հիշեցում ջոկատի յուրաքանչյուր զինծառայողին իր սրբազան պարտքի, հայրենիքին անձնվիրաբար ծառայելու, այն քաջաբար և հմտորեն պաշտպանելու, հայրենի հողի յուրաքանչյուր թիզը թշնամուց պաշտպանելու մասին՝ չխնայելով արյունը և նույնիսկ՝ կյանքը»:
ՀՀ ԱԱԾ սահմանապահ զորքերի առաջին սահմանապահ ջոկատի հրամանատար գնդապետ Գուրգեն Գալստյանն իր խոսքում նշեց, որ այսօր իրենց զորամասում տոնական, հանդիսավոր օր է, քանզի բոլորն ականատես են մի իրադարձության, որն անջնջելի հետք կթողնի յուրաքանչյուրի կյանքում: «Մենք՝ սահմանապահներս, քաջ գիտակցում ենք, թե ինչ սրբություն և պատիվ է մարտական դրոշը զորամասի համար, ուստի համոզված եմ, որ այս միջոցառումը և մշտապես մարտական դրոշի ներկայությունը նոր ուժ և եռանդ կհաղորդի վաղվա նոր ձեռքբերումների և առաջընթ ացի ճանապարհին: Տոնը մեզ համար կրկնակի նշանակություն ունի, քանզի մարտական դրոշը հանձնվում է հենց զորամասի տարեկան տոնի օրը»,- «Արմենպրես»-ի հաղորդմամբ՝ ասաց Գալստյանը:
Նա ընդգծեց, որ զորամասի ստեղծումը և պատմությունը կապված է մեր անկախ հայրենիքի զինված ուժերի և մասնավորապես սահմանապահ զորքերի ստեղծման պատմական իրողության հետ: Ներկայացնելով զորամասի անցած ուղին՝ Գուրգեն Գալստյանը նշեց, որ 1992թ. հունվարի 28-ին պետնախարար Վազգեն Սարգսյանի հրամանով ՀՀ պաշտպանության նախարարության կազմում ձևավորվեց առաջին սահմանապահ ջոկատը, որը սկզբնական շրջանում տեղաբաշխվեց Սիսիանում: Ջոկատի ստորաբաժանումները պահպանում էին Հայաստանի Հանրապետության՝ Արարատից մինչև Մեղրի ընկած սահմանները: Այս փուլում զորամասը մասնակցել է բազմաթիվ մարտական գործողությունների Երասխավանի, Վայքի, Խաչիկ գյուղի, Գորիսի և Կապանի տարածաշրջաններում:
Անձնակազմն աչքի է ընկել ցուցաբերած խիզախությամբ և անձնազոհությամբ: Նույն թվականի վերջին մարտական առաջադրանքների կատարման ժամանակ զորամասի մի շարք հերոս մարտիկներ իրենց կյանքի գնով նպաստել են հետագա հաղթանակների կերտմանը և բռնել հավերժի ճամփան: 1993թ. հոկտեմբերի 1-ին արդեն ՀՀ ազգային անվտանգության նախարարության կազմում գտնվող առաջին սահմանապահ ջոկատը Սիսիանից վերատեղաբաշխվել է Լոռու մարզի Պուշկինո ավան, որպեսզի իրականացնի Վրաստանի հետ ՀՀ հյուսիսային սահմանի պահպանությունը:
«Հաշվի առնելով արդեն մեծ չափերի հասած ապօրինի սահմանահատման, մաքսանենգության, անասնագողության և այլ դեպքերը՝ կարճ ժամանակահատվածում սահմանամերձ գյուղերում ստեղծվեցին Բագրատաշենի, Տաշիրի, իսկ ավելի ուշ՝ նաև Աշոցքի պարեկատները և դրանց ենթակայության տակ գտնվող սահմանապահ ուղեկալները: Սկզբնական շրջանում ստորաբաժանումները տեղաբաշվեցին անհարմարավետ, կենցաղային տարրական պայմաններից զուրկ ժամանակավոր կացարաններում և վրաններում: Սակայն էլեկտրաէներգիայի և խմելու ջրի բացակայության, մարդկային և տեխնիկական ռեսուրսների սղության պայմաններում պատշաճ մակարդակով իրականացվում էր պետական սահմանի պահպանությունը:
Նախկին ԽՍՀՄ զորամասից ժառանգություն ստացած կիսավեր և թալանված զինվորական ավանն աստիճանաբար վերանոոգվեց և կարգի բերվեց: Իրար հետևից սկսեցին վեր հառնել դասական տարբերակով կառուցված և ժամանակակից ստանդարտներին համապատասխանող սահմանապահ ուղեկալները Հաղթանակում, Դեղձավանում, Ճոճկանում, Ջիլիզայում, Պրիվոլնոեում, Ապավենում, Մերձավանում և Պաղ աղբյուրում: Վերակառուցվեցին ու վերանորոգվեցին ուղեկալները Դեբեդավանում, Բագրատաշենում և Գոգավանում»,- նշեց Գալստյանը:
Այժմ զորամասը համալրված է արհեստավարժ սպաներով, որոնք ունեն բարձրագույն կրթություն, մեծ մասը՝ զինվորական, ինչպես նաև պայմանագրային զինծառայողներով, որոնց հմտությունն ու մակարդակը օր օրի ակնհայտ բարձրանում է: Զորամասի մի շարք սպաներ և ենթասպաներ պարգևատրվել են կառավարական, գերատեսչական և այլ մեդալներով ու շքանշաններով: Պետական սահմանի պահպանվող տեղամասի տարբեր հատվածներում տեղակայված է փշալարային արգելափակոց, իսկ ողջ սահմանագծի երկայնքով գործում է ազդանշանային համակարգ: Զորամասն ապահովված է նորագույն սպառազինությամբ և տեխնիկական միջոցներով, ինչպես նաև ծառայողական կենդանիներով, որոնք պետական սահմանի պահպանությունը դարձնում են ավելի հուսալի ու ապահով:
Ներկայումս օր օրի ավելանում են մարտածառայողական առաջադրանքները, ծառայության և զինվորական կարգապահության նկատմամբ պահանջները: Զորամասի անձնակազմը շարունակում է պատվով իրականացնել ՀՀ պետական սահմանի պահպանության խնդիրները:
ԱԱԾ տնօրենի առաջին տեղակալ Արզուման Հարությունյանն իր ելույթում նշեց, որ սահմանային անվտանգությունը մեր երկրի անկախության, տարածքային ամբողջականության, ինչպես նաև պետության և ժողովրդի անվտանգության ապահովման կարևորագույն բաղադրիչն է, որ այսօր անցել է զարգացման հաստատակամ ճանապարհ և գտել իր ուրույն տեղը ՀՀ զինված̌ ուժերի ընդհանուր համակարգում:
Շնորհավորելով ու մաղթելով մարտական և հայրենանպաստ ձեռքբերումներով լի ծառայություն ջոկատի զինծառայողներին՝ Հարությունյանն ընդգծեց, որ մարտական դրոշն այն պետական խորհրդանիշն է, որը մարմնավորում է փառավոր ուղի անցած մեր պետության սխրանքներն ու մարտական ավանդույթները: Այս հանդիսավոր արարողությունը համալրելու է ԱԱԾ պատմության էջերը, որը բարձրացնելով սահմանապահ զորքերի ծառայողների պատիվն ու հեղինակությունը՝ վերջիններիս էլ ավելի է պարտավորեցնում անմնացորդ նվիրվելու հայրենասիրության վեհ գաղափարին՝ հավատարիմ մնալու մարտական դրոշ ին, ծառայողական պարտքին և երդմանը, պատվով հաղթահարելու բոլոր մարտահրավերները:
Հանդիսավոր արարողության ընթացքում ԱԱԾ տնօրենի, սահմանապահ զորքերի հրամանատարի և ՌԴ դաշնաին անվտանգության ծառայության' Հայաստանում տեղակայված սահմանապահ զորքերի հրամանատարի հրամաններով առաջին սահմանապահ անձնակազմի մի խումբ սպաներ և զինվորներ պարգևատրվեցին մեդալներով:
Արարողության ավարտին տեղի ունեցավ հանդիսավոր երթ, որից հետո սահմանապահ առաջին ջոկատի անձնակազմի կողմից անցկացվեցին ցուցադրական վարժություններ:
