Լեռնային Ղարաբաղի Հանրապետության արտաքին գործերի նախարար Կարեն Միրզոյանը փետրվարի 6-ին ընդունել է ՌԴ Տոմսկի ազգային հետազոտական պետական համալսարանի մի խումբ մագիստրանտների և ասպիրանտների, որոնք Արցախ են ժամանել «Ռուս-հայկական համագործակցություն» կազմակերպության կողմից' «Ռուսաստանը գլոբալ քաղաքականության մեջ» ամսագրի օժանդակությամբ նախաձեռնված ձմեռային դպրոցի շրջանակներում։
Ինչպես «Արմենպրես»-ին տեղեկացրին ԼՂՀ արտգործնախարարության տեղեկատվության և հասարակայնության հետ կապերի վարչությունից, արտաքին գործերի նախարարն ուսանողներին ներկայացրել է ԼՂՀ արտաքին քաղաքականության հիմնական ուղղությունները, անդրադարձ կատարել ադրբեջանա-ղարաբաղյան հակամարտության խաղաղ կարգավորման գործընթացին՝ տարածաշրջանային և գլոբալ զարգացումների համատեքստում։
Կարեն Միրզոյանը կարևորել է ձմեռային դպրոցի մասնակիցների այցը Արցախ՝ ԼՂՀ-ում տեղի ունեցող քաղաքական գործընթացների վերաբերյալ ճշգրիտ և անաչառ պատկերացում կազմելու, ինչպես նաև Արցախի գիտական շրջանակների ներկայացուցիչների հետ կապեր հաստատելու առումով։
ԼՂՀ արտաքին գործերի նախարարը նաև պատասխանել է մասնակիցների հարցերին։
Հանդիպմանը մասնակցել է նաև «Ռուս-հայկական համագործակցություն» կազմակերպության ղեկավար Յուրի Նավոյանը։
