Նոյեմբերի 17-ը զինվորական տոնացույցում նշվում է որպես Բուժծառայողի օր:
Տոնի կապակցությամբ նոյեմբերի 17-ին ՀՀ ՊՆ վարչական համալիրում տեղի ունեցավ հանդիսավոր միջոցառում, որին ներկա էին ՀՀ պաշտպանության նախարար Սեյրան Օհանյանը, բարձրաստիճան զինվորականներ, Երևանի պետական բժշկական համալսարանի ռեկտոր Միքայել Նարիմանյանը, «Զինվորական բժիշկների հայկական ասոցիացիա» հասարակական կազմակերպության ներկայացուցիչներ, ԵՊԲՀ ռազմաբժշկական ֆակուլտետի ուսանողներ:
Շնորհավորելով զինվորական բժիշկներին մասնագիտական տոնի կապակցությամբ' ՀՀ պաշտպանության նախարար Սեյրան Օհանյանն իր խոսքում կարևորել է նրանց դերը ազգային բանակի կայացման և զարգացման գործում, վստահեցրել է, որ թե պատերազմական տարիներին, թե հարաբերական խաղաղության ներկա ժամանակահատվածում զինվորական բժիշկները պատվով իրականացնում են իրենց առջև դրած խնդիրները, պայքարում են զինվորի ու սպայի' հայրենիքի պաշտպանների առողջության ու կյանքի համար:
Միջոցառման ընթացքում հնչած շնորհավորական ելույթներում ընդգծվել է, որ ՀՀ զինված ուժերի կազմավորմանը զուգընթաց ձևավորված ԶՈւ ռազմաբժշկական ծառայությունը անցած տարիներին մեծ վերելք է ապրել՝ այսօր արդեն ունենալով տեխնիկապես հագեցած և միջազգային չափորոշիչներին համապատասխան հոսպիտալներ, բուժսարքավորումներ, և որ ամենակարևորն է' բարձրակարգ բժիշկ մասնագետներ:
Այսօր ԶՈւ ռազմաբժշկական ծառայությունը ակտիվորեն համագործակցում է ՀԱՊԿ-ի և ՆԱՏՕ-ի հետ: Բազմաթիվ բժիշկ-սպաներ և քաղաքացիական հատուկ ծառայողներ վերապատրաստվում են գործընկեր պետություններում, մասնակցում են տարատեսակ միջազգային ռազմաբժշկական վարժանքների և հավաքների, ինչը, անկասկած, նպաստում է զինվորական բժշկության մակարդակի բարձրացմանը:
