Հայաստանի Հանրապետության նախագահ Սերժ Սարգսյանը գերմանացի օրենսդիրներին հորդորել է չվախենալ Թուրքիայի նախագահ Ռեջեփ Թայիփ Էրդողանի' Բեռլինի ու Անկարայի միջև հարաբերությունները վատացնելու նախազգուշացումներից և շարժվել առաջ' ընդունելով Օսմանյան ուժերի կողմից հայերի նկատմամբ իրականացված 1915 թվականի զանգվածային կոտորածները որպես ցեղասպանություն: Այս մասին Սերժ Սարգսյանն ասել է գերմանական Bild-ին տված հարցազրույցում:
«Ես վստահ եմ' Բունդեսթագի պատգամավորները տեսնում են խնդիրը նույն կերպ և թույլ չեն տա իրենց վախեցնել: Եթե մեկը սկսում է կարճաժամկետ քաղաքական շահերի համար գնալ փոխզիջումների, ապա դա վերջանում է նրանով, որ այդ փոխզիջումները կրկին ու կրկին շարունակվում են: Եվ դա շատ վատ է Գերմանիայի համար, վատ է Եվրոպայի ու ողջ աշխարհի համար»,- ասել է ՀՀ Նախագահը:
Անդրադառնալով փախստականների խնդրի շրջանակում ԵՄ-Թուրքիա համագործակցությանն ու այդ համագործակցության միջոցով Գերմանիայի վրա գործադրվող ճնշմանը' Սարգսյանն ասել է. «Ես ունեմ զգացում, որ այդ համաձայնությունը կառուցված է ավազի վրա և այնպիսի գործընկերոջ հետ, ինչպիսին Թուրքիան է, դժվար կլինի դա իրագործել դեռ երկար ժամանակ»:
