Րաֆֆի Հովհաննիսյանի ու Գագիկ Ծառուկյանի հանդիպման կադրերում Վարդան Օսկանյանը դեմքի բավական դժգոհ ու մտահոգ արտահայտություն ուներ: Նա այդպես էլ չի արտահայտվել այդ հանդիպման ու Հայաստանում հետընտրական գործընթացների հաշվով:
Վարդան Օսկանյանն ու Րաֆֆի Հովհաննիսյանը նախքան ընտրությունները դիտարկվում էին որպես Հայաստանում նոր քաղաքական մշակույթի խորհրդանիշեր: Դա բացատրվում էր ոչ միայն նրանց ամերիկյան ծագմամբ ու նրանով, որ «պատիվ չեն ունեցել» ապրել Խորհրդային երկրում: Ասում էին նաեւ, որ ԱՄՆ-ն այդ գործիչների միջոցով փորձում է իր քաղաքականությունն իրականացնել, եւ ինչպես ասում է դեսպան Հեֆերնը, այնպես անել, որ «Հայաստանը միայն մեկ գործընկեր չունենա»:
Թե Վարդան Օսկանյանը, թե Րաֆֆի Հովհաննիսյանն, իրոք, հայկական հասարակական-քաղաքական մշակույթում բավական թարմություն են մտցրել: Օրինակ, Րաֆֆի Հովհաննիսյանի հիմնած Ժառանգություն կուսակցությունը փոքր ռեսուրսներով ու կազմով այնքան պրոֆեսիոնալ խորհրդարանական աշխատանք էր իրականացնում, որ փրկում էր ողջ խորհրդարանի դեմքը: Բացի այդ, Ժառանգության պատգամավորները սերտ աշխատում էին քաղաքացիական նախաձեռնությունների հետ եւ կարեւոր հարցերը բարձրացնում քաղաքական մակարդակ:
Վարդան Օսկանյանը հիմնել է Սիվիլիթաս հիմնադրամը, ինչպես նաեւ ՍիվիլՆեթ ինտերնետային հեռուստաընկերությունը, որն ամենապոպուլյար հեռուստաընկերություններից մեկն է: Նա աշխատել է նաեւ քաղաքացիական ոլորտում եւ քիչ բան չի արել դրա կայացման համար:
ՍիվիլՆեթն ուղիղ եթերով հեռարձակում է Րաֆֆիի հետընտրական հանրահավաքները, եւ փաստորեն ամենաակտիվն է ներկայացնում շարժումը: Միեւնույն ժամանակ, հեռուստաընկերությունում պարբերաբար հանդես են գալիս փորձագետներ, ովքեր պնդում են, որ շարժումը կոնկրետ նպատակներ չունի, որ Րաֆֆին անորոշ է խոսում, եւ շուտով այս ամենը կավարտվի:
Ինչպիսի՞ն է Վարդան Օսկանյանի դիրքորոշումը հետընտրական զարգացումների հարցում: Չէ որ նա ինքն էր հանդես գալիս ընտրությունների ժողովրդավարացման, պետության կառավարման հարցում քաղաքացիների ներգրավման պահանջներով: Սակայն Հովհաննիսյանի ու Ծառուկյանի հանդիպմանը Օսկանյանի դեմքի արտահայտությունը խոսում է այն մասին, որ ինչ-որ բան անհանգստացնում է նրան:
Մարդկայնորեն դա հասկանալի է: Չէ որ եթե ԲՀԿ հետ համագործակցությունը չլիներ, Րաֆֆիի տեղում կարող էր լինել Օսկանյանը: Եվ ամեն դեպքում, հազիվ թե դա լիներ Օսկանյանի խոժոռ դեմքի պատճառը:
Մարտի 11-ին սկսվում է Երեւանի ավագանու առաջադրումը, եւ ԲՀԿ ցուցակում ըստ ամենայնի կցանկանան ներգրավել Վարդան Օսկանյանին: Ճիշտ է, արդեն նշվում է, որ ցուցակը կգլխավորի Գուրգեն Արսենյանը, սակայն Օսկանյանին հարկ կլինի կողմոնորոշվել՝ խորհրդանշական իմաստով՝ ՍիվիլՆեթով շարունակել Րաֆֆիի ժողովրդական հանրահավաքների ռեպորտաժները, թե լուսաբանել Արսենյանի նախընտրական արշավը:
Վարդան Օսկանյանը ոչ մի կերպ չի կարողանում ընտրել: Խորհրդարանական ընտրություններին ԲՀԿ-ն ընտրելը ոչ մի բան չտվեց Օսկանյանին քաղաքական դիվիդենտների տեսքով: Ինչպիսի՞ն կլինի երկրորդ ընտրությունը:
