Մադրիդյան սկզբունքները հենվում են երեք սկզբունքների վրա, և այդ սկզբունքների վրա հիմնվում է բանակցային գործընթացը. Իսկ այդ երեք սկզբունքների մեջ մեզ համար շատ կարևոր նշանակություն ունի մեկ հարց՝ ստատուս և անվտանգություն։ Այս մասին Հանրային հեռուստատեսության ««Այսօր իրականում» հաղորդման ժամանակ նշել է ԱԳ նախարարի պաշտոնակատար Զոհրաբ Մնացականյանը՝ անդրադառնալով Արցախի խնդրի լուծման խնդրին։
«Մենք կարողացանք շատ արագ աշխատել Մինսկի խմբի համանախագահների հետ, կարողացանք առաջին հանդիպումը կազմակերպել հուլիսի Բրյուսելում, երկրորդը՝ Նյու Յորքում, սեպտեմբերին, երրորդ հանդիպումը Միլանում։ Այդ ընթացքում մենք կարողացել ենք արտահայտել այն տեսլականը, որով գտնվում ենք այդ գործընթացի մեջ, լսել հակառակ կողմին, լսել համանախագահողներին։ Մենք կարողացանք խստորեն ուշադրություն դարձնել որոշ սկզբունքների, որոնք անվանել ենք խաղաղությանը նպաստող միջավայր։
Մենք կարևորություն ենք տվել հարցերին, որոնք վերաբերում են, ասենք, հռետորաբանությանը։ Կարելի է ցույց տալ հայրենասիրական պոռթկում և ասել ամեն ինչ, և կարելի է ավելի պատասխանատու լինել։ Եթե մենք ասում ենք այն, ինչ ասում ենք առանց խիստ արտահայտված էմոցիաների, դա չի նշանակում, որ մեր մտադրությունները այդքան հստակ չեն։ Դրանք շատ հստակ են, ինչ վերաբերում է ստատուսին ու անվտանգությանը»,- հայտարարեց նա։
Զոհրաբ Մնացականյանն անդրադարձավ Ադրբեջանի ռազմատենչ հռետորաբանությանը՝ նշելով. «Ամբողջ հայությանը թշնամի դարձնել և ենթադրել, որ նման մթնոլորտում դու կարող ես համոզիչ լինել, որ դու լուրջ ես վերաբերվում բանակցային գործընթացին... Շատ էական է ռիսկերի նվազեցումը էսկալացիայի առումով։ Մեզ համար շատ մտահոգիչ էր այն, ինչ տեղի էր ունենում Նախիջևանում։ Շատ խիստ ձևով մենք անդրադառնում էինք դրան։ Աշխատում էինք համանախագահների հետ, հարցը բարձրացնում էինք նաև ՀԱՊԿ-ում՝ տեղեկացնելով մյուս գործընկերներին, որ նման զարգացումներ կան և դա շարունակվելու է»։
Հարցին, թե կարելի՞ է ասել, որ ստատուսն ու անվտանգությունը այն կետերն են, որից ցած մենք չենք իջնի բանակցություններում, նա արձագանքեց. «Միանշանակ։ Մենք առաջին հերթին նկատի ունենք անվտանգության հարցը, որովհետև հարցը մեզ համար հարցը շատ կոնկրետ է։ Երբ քայլում ես Ստեփանակերտում, դու դա զգում ես, որովհետև խոսքը մարդկային կյանքերի մասին է։ Ղարաբաղի էկզիստենցիալ անվտանգությունը մեր գերակա հարցն է։ Իսկ դրանից բխում է ստատուսը։ Ստատուսը երաշխիք է, որ անդրադառնում է անվտանգությանը։
Ստատուս նշանակում է, որ Արցախի ժողովուրդը տերն է իր կարգավիճակի, որն արտահայտում է համապատասխան ձևով, որը կոչում ենք ռեֆերենդում, թե ինչպես։ Թե ինչպես է դա արվելու, ինչպես է համադրվում ընդհանուր փաթեթի մեջ, դա ամենաբարդ խնդիրն է, որ վերաբերվում է բանակցային գործընթացին։ Չի կարող լինել իրավիճակ, չի կարող լինել որևէ մարդ Հայաստանում, Ղարաբաղում կամ որևէ տեղ, որ եթե չենք ապահովում այնպիսի համադրություն, որտեղ մենք զարգացնում ենք բավարար, հստակ երաշխավորում, որ մեր գծերը, մեր հիմնական դիրքորոշումները չեն խախտված, որ մենք կարող ենք դա տեսնել որպես բավարար հստակ երաշխիք, չի կարող լինել պայմանավորվածություն, որը մեզ համար համոզիչ չլինի։ Շատ կարևոր է նաև, որ կա Հայաստանի հասարակությունը եւ Արցախի հասարակություն»։
Ինչ վերաբերում է փոխզիջումների համատեքստում տարածքներ զիջելու պատրաստակամությանը, Մնացականյանն ասաց. «Ես չեմ անդրադառնալու որևէ նման հարցի։ Խոսում են զիջումների մասին. զիջումների՞, թե՞ փոխզիջումների։ Մեզ հետ զիջումների մասին խոսողները մյուս կողմի հետ խոսում են զիջումների մասին, թե չեն խոսում։ Ես երբեք չեմ անդրադառնա այդ հարցին, քանի դեռ վստահ չեմ, որ ունենք մի իրավիճակ, երբ հնարավոր է ամբողջության մեջ տեսնել պատկերը»։
